Gana de istare in campègiu: vacàntzia in Orgòsolo

(IlMinuto) – Casteddu, 26 de làmpadas - Est tempus de vacàntzias e su logu chi bos cussigiamus est Orgosolo, unu logu chi at a praghere meda a is istimadores de sa natura.

Pro lòmpere a Orgòsolo dae Tàtari e dae Casteddu su consìgiu nostru est de arribare a Nùgoro, dae in ue si depet sighire a bia a sud cun sa SP 58.

In su coro de sa Barbàgia, Orgòsolo est una de is medas perlas de Sardigna, una regione chi at meda de donare a is chi andant a la bìdere.

Orgosolo est connòschida pro is murales famados suos, chi contant de chistiones sotziales, ambientales e polìticas.

In custa bidda, bolent intèndidos fintzas totu is grustos, de giòvanos e mannos chi cantant a tenore, su cantu traditzionale de sa Barbàgia, e no isceti de custa, chi s'Unesco dd'at decraradu Patrimòniu de s'Umanidade.

Pro is istimadores de su trekking cussigiamus un'escursione in su Padente de Montes, in mesu a is àrbores seculares e is pinnetos antigos de is pastores, e una bìsita a su Museu Naturalìsticu de su Supramonte.

Si bolides andare a Orgòsolo pro is vacàntzias bostras su logu giustu est su Campègiu Supramonte, in localidade Sarthu Thithu, in ue ddoe at fintzas unu tzilleri, una pizzeria e unu ristorante de coghina tìpica sarda de su Supramonte e de sa Barbàgia. Sunt de tastare pro fortza is "Mahàrrones de punzu" cundidos cun bagna de petza de sirbone, su trataliu arrustu e is casadinas.

Su Campègiu Supramonte est fintzas unu tzentru de escursiones, de fàghere a pee, in fuoristrada, a caddu, in mountain bike, pro pòdere bìdere logos chi sunt tra is prus bellos de Sardigna, che a Monte Novu, Santu Jubanne, Nuraghe Mereu, su padente primàrgiu de su Supramonte, Gorropu, Tìscali, is domus de janas de Sirilò e s'ingurtidòrgiu naturale de "Su Sielhone", in prus de is murales chi sunt famados in totue e is allevamentos minores de fermesìlicu, sa casta de babbautzos chi faghent sa seda.

Orgosolo est unu logu de connòschere andende a fùrriu in is carreras suas, bivende a beru is traditziones suas in pare cun sa gente de su logu.

Carta de identidade de su logu