Tarragona una tzitade de non pèrdere. Biàgiu a Catalugna

(IlMinuto) – Casteddu, su 21 de làmpadas - Una vacàntzia in una tzitade galana de sa Catalugna: Tarragona. Un'esperièntzia de biàgiu chi cheret cussigiada pro is giòvanos. Un'arcu romanu, unu portale romànicu, una gianna modernista. Medas, e semper interessantes, sunt is giannas de sa Catalugna. Comintzat de aici unu biàgiu in su tempus, acumpangiadu dae sa mùsica de una limba antiga chi at s'ispìritu forte de is òmines chi dda faeddant e chi contat un'istòria de importu.

Sa Catalugna ischit contare istòrias antigas de unu pòpulu fieru, chi s'iscurtat mègius sètzidos in sa mesa, bufende unu binu bonu e papende "pa amb tomàquets" o "escudella i carn d'olla".

In Catalugna, tra is medas logos de bìdere b'est de seguru Tarragona, tzitade in s'oru de su mare, aberta, lugorosa e semper acasagiadora. Sa tzitade prus manna de sa Costa Daurada dae su 2000 est intrada in su Patrimòniu de s'Umanidade pro sa sienda archeològica e architetònica sua.

In cue si podet bìdere sa tzitade romana antiga de Tarraco, sa Tarragona medievale cun sa catedrale sua, ma nche est fintzas s'àtera Tarragona: sa de is plajas de arena fina pro si nche corcare a su sole, in antis de si sètzere in sa mesa in su bighinadu de El Serrallo, in ue nche sunt is mègius ristorantes de pische, e in fines pro si lassare giùghere note-note dae s'àera de festa de su portu!

Sa tzitade catalana est una prenda de iscobèrrere a beru!

Incomintzamus sa visita de Tarragona dae su coro de sa tzitade betza (Part arta, Tarraco Superiore) a Placa del Rei, logu importante de addòbiu pro sa gente chi lompet de totu sa provìntzia. Inoghe s'agatat su primu museu de importu: su Museu Archeològicu Natzionale de Tarragona. Bessende, bos ais a agatare a dae in antis de un'àteru museu, su Museu de s'istòria, dae ue sa visione de su Pretorio e de su Tzircu Romanu bos at a lassare sena faeddos. A pustis, punnende conca a sa costera si podet ammirare s'Anfiteatru Romanu (Rambla Nova). S'Acròpoli archeològica de Tarragona est su coro de sa tzitade. Impossìbile no ammirare is murallas romanas e non reconnòschere is turres de is murallas matessi: sa turre Minerva, sa turre Sant Mgì, sa turre de s'Arquebisbe, sa turre de su Seminàriu e sa turre de Cabiscol. Su Foro provìntziale est un'àtera istrutura romana de bìere impare a su Teatru romanu e a su Foro de sa colònia. Inoghe, est de non pèrdere puru sa Catedrale de Santa Tecla (Pla de Palau 2). A sa fine de Pllol de Pla, unu pòrticu inditat s'istrada romana de Passeig Arqueol.

S'atmosfera de custa tzitade est bella de bìvere andende a pee in is carreras suas. In su tzentu si podet bufare puru una birra a prètziu baratu.

Si bos bolides andare a su mare is plajas sunt a nord de sa tzitade.

Bos ammentamus ca pro mandigare coghina tarragonesa bos depeis andare a El Serrallo, su cuartieri de is piscadores. Inoghe si màndigat su pische prus bonu de sa tzitade!

Partide luego, ca unu biàgiu in sa terra ispantosa de Catalugna, una vacàntzia in sa tzitade de Tarragona est un'esperièntzia chi bolet bìvida, un'esperièntzia de non pèrdere!

Carta de identidade de su logu