Su 28 de onniasantu in Casteddu pro su sardu in iscola

20 Onniasantu 2014

In su mudìmene de sos mèdia, sa Giunta Regionale at detzisu de segare is finantziamentos pro sos progetos in limba sarda pro s'annu iscolàsticu 2014-15.


S'Assessora Clàudia Firino, in sos meses passados nos at leadu in giru, narende chi issa de custas chistiones no nd'ischit, chi aiat bisòngiu de bi pensare mègius: ma in su mentres chi s'assessora bi pensat bene e si ponet a istudiare, ant pensadu de iscontzare totu su chi de bonu aiat fatu sa Regione in sos annos passados. A bisu nostru custas sunt lanas chi cuant un'idea contrària a s'impreu de su sardu comente limba normale, istandardizada e foras dae su folclorismu.Un'àtera iscusa chi ant bogadu a campu est chi non b'at dinare pro more de su Patu de Istabilidade : ma custa puru est una fàula, ca amus bidu chi su dinare giai l'ant atzapadu pro medas cosas prus pagu importantes e cando b'aiat de lu pònnere pro sas categorias privilegiadas: pro fàghere un'esèmpiu, sos 20 milliones de èuros chi s'àtera Giunta aiat dadu a sas iscolas privadas sunt minimados de su 10 % ebbia, essende chi ocannu l'ant dadu 18 milliones.


A sas iscolas chi cherent fàghere cursos de sardu ocannu non lis cherent dare nudda, mentes chi s'àteru annu lis aiant dadu 455.000 èuros.


Nois non podimus abarrare mudos mentres chi sa giunta regionale iscontzat totu su chi aiant fatu de bonu in sos annos passados pro sa limba nostra.


Cherimus chi s'Assessora Claudia Firino fatzat essire luego su bandu pro sos cursos in sardu in oràriu curriculare, sighende sos critèrios de su bandu de s'annu passadu, in modu chi sas iscolas apant su tempus pro presentare sos progetos e aparitzare deretu sos cursos pro su 2015. E cherimus chi sa Giunta torret a finantziare sos progetos de sos mèdia in sardu, dende alenu a unu setore chi est bivende una crisi lègia meda.


Pedimus a totu sos insegnantes, giornalistas, tradutores, operadores e a chie totu in custos annos at traballadu pro sos progetos in limba sarda, a sos istudiantes sardos e a sas fortzas polìticas e sotziales chi gherrant pro unu bilinguismu cumpridu in Sardigna, de falare a pratza, benende a manifestare in pare cun nois su 28 de onniasantu a sas h. 11:00 de mangianu, cara a sa Regione in viale Trento in Casteddu.


Sa limba nostra est un'aina de isvilupu culturale e podet dare traballu a gente meda, investende in sa cussèntzia natzionale nostra: e como tocat a nois de falare a pratza totu paris pro la difèndere.


Assòtziu Culturale Aziru


© RIPRODUZIONE RISERVATA