Bides, binos e famìlia in s'istòria de s'azienda Vinicola Cherchi de Ùsini

Billia Cherchi e su progetu de produire bèvidas de calidade cun àghinas autòctonas
28 Martzu 2020
vinocola cherchi

* Dae sa terra a sa butìllia * - Un'istòria de binos chi s'aùnit a s'istòria de una famìlia. Semus faeddande de s'azienda “Vinicola Cherchi” de Ùsini, una cantina chi contat totu sa bellesa de su traballu de sos bingiateris de Sardigna.

Nàschida in su 1970, custa realidade produtiva est abarrada arraighinada in su territòriu suo cun sa passione de semper. Est istadu Giovanni Maria Cherchi, connoschidu cun su nùmene de Billia, a coltivare su bisu de fàghere connòschere a totus sos binos tìpicos de Ùsini, una bidda in provìntzia de Tàtari in ue si faghet binu bonu meda.

A conca sua, Billia Cherchi aiaiat unu progetu ebbia: su de produire bèvidas de calidade manna, binos cun s'ànima e sa fortza de unu territòtiu sintzeru.

Gasi, Billia torraiat a iscobèrrere una ratza de bide antiga e autòctona: su Cagnulari. Si oe, difatis, su Cagnulari est unu binu famadu e apretziadu est totu mèritu de sa passione e de su traballu chi at mòviu a Billia Cherchi.

Su sacrifìtziu cosa sua, però, non s'est firmadu gosi, pro ite in s'interi Billia aiaiat incumentzadu unu traballu de valoritzatzione de su Vermentinu e de is caraterìsticas suas. Totu custu at otentu unu resurtu importante meda: su de propònnere a su mercadu unu binu cun un'identidade dislindada: su Vermentinu de Ùsini.

vinicola cherchi binos

Cumentzende dae custu momentu, sa de sa “Vinicola Cherchi” est istada un'istòria de resessidas chi ant fatu connòschere in totue su nùmene de sos binos produidos de s'azienda usinesa.

Semper che semper, sos de sa famìlia Cherchi sighint a si pensare comente bingiateris e est pro custu ca su traballu issoru cumentzat in sa bìngia e finit feti cando su binu intrat in sas ampuddas.

De onni manera, tocat a nàrrere ca su traballu de sos Cherchi non s'est firmadu cun su Vermentinu e su Cagnulari. S'azienda, difatis, de sos annos Otanta coltivat finas àghina Cannonau.

Totus sas propostas de sa “Vinicola Cherchi” ant otentu tzertificatziones de importu: Su Vermentinu at sa tzertificatzione DOC - “Denominazione di Origine Controllata” e su Cagnulari e su Cannonau ant otentu sa tzertificatzione IGT.

Oe sos Cherchi proponent tres sèries de binos: sa sèrie de sos “Classici”, sa sèrie “Billia”, dedicada a Billia Cherchi, e sa sèrie “Gli Speciali”. In prus sa cantina usinesa proponet duos distillados: “Nonnu Elogu Bianca” e “Nonnu Elogu Ambrata”.

 

 

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu