CTM e COVID-19: sa denuntzia de s'ORSA Casteddu
![CTM ORSA](/sites/default/files/styles/header_md/public/upload/2020/03/covid-19.jpg?h=f2de9e3d&itok=nJ96qosW)
“Arriscu cuncretu de impestadura coronavirus po is autistas de su CTM”. Est custu s'ogetu de una nota de imprenta de sa segreteria casteddaia de su sindacau ORSA.
A reclamai s'atentzioni de su sindacau est s'Òrdini de Serbìtziu n. 38, emitiu de su CTM/SpA su 10 de su mesi de martzu de su 2020, chi ponit a arriscu cuncretu de impestadura coronavirus is autistas de su CTM/SpA de Casteddu.
“Custu OdS – si ligit in sa nota – non esecutat e ingannat dispostas obligatòrias previdias in is DPCM ufitzializaus de su Guvernu. Ùrtimu su DPCM delg/03/2020 chi, in prus de is àterus pretzetus, previdit s'òbligu de arrespetai una distàntzia de seguresa chi siat assumancu de unu metru intre is personis”. “ Su CTM – sighit s'ORSA – non pigat in cunsidèriu custu òbligu aintru de su bus non allacanat a manera ladina su logu chi iat a depi essi po sa seguresa de s'autista, de mancu marcat su logu aundi is passegeris depint abarrai (setzius e in pei) po fai arrespetai sa distàntzia inditada”.
A cantu denuntziat sa nota, a oi sa situatzioni est sa chi sighit: in giru ddoi funt postalis de tipu Vanhool chi non tenint s'intrada acanta de s'autista blocada, ducas is passigeris artziant de sa parti de ananti de su postali, “a manera diversa – pretzisat su comunicau – de su chi ant fatu is àteras aziendas de TPL, in Sardigna e a foras de s'ìsula”.
Intrendi de sa parti de ananti sa genti chi depit timbrai e sa chi depit pediri scedas abarrat a una distàntzia prus pitica de sa istabilia de su DPCM. Duncas, a manera lògica, is passegeris podint essi veiculadoris possìbilis de su virus, chi podit impestai s'autista, privu de protetzioni candu s'agatat a sa ghia. Difatis, is aparitzus de protetzioni podint essi impitaus scèti candu s'autista est màrturu, opuru candu depit intervènniri cun passegeris chi creit màrturus.
S'ORSA, duncas, pedit a is “Organi d'indirizzo” de intervènneri luegu po fai arrespetai totus is prescritzionis previdias de is DPCM ufitzializadas de su Guvernu po amparai sa saludi de is traballadoris e de is passegeris de s'arriscu de impestadura de COVID-19.
Fotografia pigada de Flickr. Autori Prachatai