Kastià: s'armonia de binos chi ant unu nùmene chi pertocat sa mùsica

Adagio, Allegro e Moderato: sos sìmbulos a cuncòrdia de una cantina ispantosa
14 Martzu 2020
kastia bides

*Dae sa terra a sa butìllia * – Sos binos produidos dae sa cantina Kastià sunt bèvidas de primore chi naschent in sas terras de Castiadas. Unu logu meravigiosu in ue su mare, s'arena e sa vegetatzione sunt su fundamentu a sa produtzione de unu binu bonu.

S'idea de Beppe, Michel e Franco de fàghere unu binu de calidade est fìgia de una chena in su Porte Maillot de Parigi, candu, faedda faedda, Michel espressaiat a sos duos amigos s'intentzione de achistare unu "vignoble" in su Midi frantzesu (su cabu de giosso de sa Frantza) pro produire binu de primore. Unu binu chi aeret acuntendadu su disìgiu chi aiat de collire su chi sa vida at de bellu.

Ascurtadu su progetu de s'amigu, Beppe e Franco La Sala, apassionados de binos, aiant propostu a Michel de pònnere in òpera paris cun issos unu “vignoble” in Sardigna, terra de bìngias e de sole. Michel aiat atzetadu luego sa proposta de sos amigos casteddajos. Gosi est cumintzada s'aventura de Kastià.

Sas bides de Kastià (Cannonau, Carignanu, Merlot, Vermentinu, Nascu e Cabernet Souvignon) sunt istadas prantadas in unu terrinu arenàrgiu, chi derivat dae s'isfaghidura de su granitu. Onni ètaru de bìngia non faghet in prus de 50 cuintales de àghina. Sa produtzione, difatis, est limitada a posta dae sa pudadura.

kastia aghina

Sa cura sighida de sas matas, s'issèberu de no impreare produtos chi impestant sa terra, su respetu de sos tempos de sa natura, sa binnenna fata a manu, s'issèberu atentu de sos budrones e sa catzigadura pronta, permitint a sos meres de Kastià de otènnere unu produtu sanu, chi non abisòngiat de perunu interventu in cantina pro l'acontzare. A custa manera Beppe, Michel e Franco regalant a su mercadu binos primorosos chi, sutapostos a anàlisis chìmicas fitianas, dimustrant sa calidade manna de onni eticheta.

Sos binos Kastià, duos "Isola dei Nuraghi IGT", Adagio e Allegro, e unu "Cannonau di Sardegna DOC", su Moderato, sunt totus bèvidas naturales, sanas e bonas meda.

Adagio est unu binu fatu cun su 65% de àghina Cannonau, su 20% de Merlot e su 15% de Cabernet Souvignon.

Allegro, imbetzes, est sa resessida de unu blend fatu cun su 70% de àghina Vermentinu, su 15% de Nascu e su 15% de Chardonay.

Moderato, a s'imbesse, est unu binu fatu cun àghina Cannonau chentu pro chentu.

Cada una de sas propostas fatas dae Kastià est una bèvida saborida e chi at un'armonia bella che a una mùsica.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu