Brumare una cultura fata de lùpulos, maltos e àteros ingredientes de primore

Birras ispetziales chi alabant a su paladu
30 Arbili 2020
birras brumare

* Dae sa terra a sa butìllia * - Fiat su 2014 cando sos birrifìtzios artesanales sardos s'arrichiant de una realidade produtiva noa: su birrifìtziu Brumare de Bauladu, una biddighedda in provìntzia de Aristanis.

Brumare naschet dae un'idea de Fabio Frau, mere de su birrìfitziu e responsàbile de sas produtziones. Su mastru birràiu Frau at incaminadu s'impiantu cosa sua cun una sala cota de 500 litros.

Su de Bauladu est unu birrifìtziu de primore, chi firmat retzetas chi pro su prus s'ispirant a sos repertòrios traditzionales, est a nàrrere a sos de s'iscola seculare de sa Fiandra e de sa Vallonia.

Faghimus unu passu in dae segus: semus in su 2004, annu chi biet su mastru birràiu cumentzare a produire birra in domo, isperimentende retzetas birràias innovativas e caraterìsticas.

Posca de chimbe annos, in su 2009, leat parte a unu cuncursu Tècnicu-Gestionale aprontadu pro sos imprendidores de sa birra. Non est acabada inoghe. In su 2012 leat parte a unos cantos de seminàrios chi ant comente tema sos "Aspetti tecnico gestionali dei microbirrifici".

brumare birras

Est gràtzias a totus custas esperièntzias puru chi su birrifìtziu Brumare cumentzat a produire duas birras màstrinas licanzas meda: sa Chena e sa Brama. Ammaniadas impreende ingredientes simples e naturales, sos matessi chi permitit a Frau una produtzione de calidade manna.

Sempermai sas etichetas Brumare non finint cun Chena e Brama. Su birrìfitziu proponet puru sa birra Impitta, sa Tula e sa Nia.

Una birra crara Wit fata cun coriandru e iscortza de aràngiu. Chena est una bèvida chi at un'ispuma carca e firma. Caraterizada de nuscos crispos, est una birra frisca chi lassat unu bellu marigosu finale. Perfeta a la bufare in s'istiu.

Brama, imbetzes, est una birra adata pro s'ierru. Una bèvida a colore de pinnadellu, chi at unu sabore forte meda. Una Grand Cru fata cun mele de cardu, òtima comente birra de riflessione.

Cun 9 grados de alcol, Impitta est una birra crara Ale fata cun ispètzias durches e cun maltu de òrgiu e de trigu. Frisca e marigosa custa bèvida est bona a la bufare mandighende antipastos, petza arrustu e supas fatas cun pische.

Ammaniada cun maltu de òrgiu, avena, lùpulu e cafè de Giava, sa Tula est una birra iscura Porter, chi posca de l'àere bufada lassat in buca unu sabore de cafè. Interessante pro acumpangiare pratos de petza arrustu e durches fatos cun cafè.

In fines agatamus Nia, una birra iscura APA. Una bèvida rica chi at tra sos ingredientes suos sa saba de figumorisca. Una birra importante, beverina e ecuilibrada a manera perfeta.

S'ispuma, su nuscu e su sabore de onni birra Brumare faghent de onni eticheta una bèvida ispetziale.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu