“Cantina Sociale della Vernaccia” de Aristanis sa mamma de sa valorizatzione e sa cunsacratzione de sa Granatza de Aristanis in su mundu

Unu catàlogu interessante fatu de unu distilladu, de ispumantes e de binos biancos e nieddos de primore
28 Arbili 2020
cantina sociale della vernaccia

* Dae sa terra a sa butìllia * - Nàschida in su 1953, sa “Cantina sociale della Vernaccia” de Aristanis est sa mamma de sa valorizatzione e sa cunsacratzione de sa Granatza de Aristanis in su mundu. Difatis, custa cantina coperativa est sa prus importante de sa zona a inghìriu de Aristanis. Sos terrinos coltivados dae sos sòtzios suos s'agatant in su territòriu de su Sinis e de sa Badde de su frùmene Tirsu.

Sas de su Sinis sunt terras renalzas e ricas de sales chi dae su mare leant aèrea frisca e rica de nuscos aromàticos; sas terras de sa Badde de su Tirsu, imbetzes, sunt ricas de luzanas e renas.

Sas bides pastinadas dae sos sòtzios de sa “Cantina della Vernaccia” sunt duas bides autòctonas: sa Granatza e sa Nieddera.

Sa Granatza de Aristanis est una cultivar cun pupuzone biancu diversa meda de sas duas ratzas italianas chi ant su matessi nùmene: sa Granatza de San Gimignano e sa de Serrapetrona. Custa ratza de àghina est famada meda pro sa produtzione de binos de imbetzamentu ossidativu e est perfeta puru pro fàghere binos biancos beverinos comente su “Terresinis”, unas de sas etichichetas prus bendidas dae sa coperativa.

Comente amus giai atzinnadu, sa segunda ratza de bide coltivada dae custa realidade produtiva est sa Nieddera. Custa est una ratza pagu connòschida a dae foras de sas làcanas aristanesas. Difatis, semus faeddende de una bide chi betit pagu àghina e chi at bisòngiu de terrinos cun caraterìsticas pretzisas. Dae custa frutora s'otenet unu mùstiu iscuru meda, chi faghet binos friscos, tànnicos e chi ant unu colore ispantosu comente su de su binu nieddu “Montiprama” e de su rosadu "Seu".

cantina sociale vernaccia

Non est totu, pro ite sa “Cantina Sociale della Vernaccia” produit puru binos cun àteras ratzas de àghina, chi est cunferida de sos bingiateris chi allevant bides Vermentinu, Cannonau e Monica. Dae custos frutos naschent etichetas DOC e DOCG. Un' esempru est su de “Ugone III”, unu binu DOCG chi est s'esitu de sa vinificatzione de àghina binnennada in bìngias coltivadas in Gaddura.

In prus, de unos cantos annos sa proposta de custa realidade produtiva s'arricat de sa produtzione de una “Grappa di Vernaccia Invecchiata” e de ispumantes brut e rosé, bèvidas chi sighint una segunda incubonadura in autoclave o in ampudda puru.

Protagonistas de su catàlogu de binos de sa “Cantina sociale della Vernaccia” sunt sos biancos “Juighissa”, “Judikes”, “Vernaccia”, “Ugone III”, “Terrenis”, “Benas”, “Sinis Bianco”, “Is Arutas” e “Remada”; su rosadu “Seu Nieddera”; sos Ispumantes “Is Arutas Brut”, “Aristanis Rosè” e “Seu Brut”; sos binos nieddos “Corash”, “Maimone”, “Montiprama”, “Don Efisio” e “Sinis” e sa “Grappa di Vernaccia Invecchiata”.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu