Controllus in follow up malàidus oncològicus e àterus malàdius: cantzellaus
Is òminis e is fèminas non morrint feti de coronavirus. Est cantu sutalineat su movimentu "DONNE LIBERE IN LOTTA PER IL DIRITTO ALLA SALUTE • FÈMINAS LÌBERAS IN LÙTA PRO SU DERETU A SA SALUDE", “comente malàidas oncològicas e boxi de unu nùmeru mannu de fèminas e de òminis chi si signalant is disservìtzius mannus de sa sanidadi tataresa iscumbataus in is ùrtismus duus mesis”. Est a faci de custa destrossa mala chi su movimentu ghiau de Luana Farina espressat su disacòrdiu e s'apensamentu suu po custa firmada bòfia de is Diretzionis Sanitàrias AOU e ATS de Tàtari e ocasionada de s'apretu coronavirus.
Funt medas, difatis, is malàidus oncològicus, is malàidas senològicas e is àterus malàidus puru chi ant signalau custu arragu malu a su movimentu, chi in nd'una nota de imprenta pretzisat: “Mancai apant assegurau is terapias oncològicas e radiològicas, crastinadas feti de pagu diris, funt stètius blocaus e transius a una data de istabiliri galu totus is controllus programaus in Follow Up de sa SMAC: ecografias, controllos cardiològicus, ginecològicus, controllus radiològicus, operatzionis e controllus istrumentalis po su cancru a sa tita, screening a is titas, madri, colon e totus su chi pertocat a su prevenimentu de sa malàdia e de is recadimentus”. Non est totu! “Su mantessi destinu – sutalineat sa nota – est tocau a genti meda chi tenit àterus malis grais a su coru, a is prumonis, a is arrigus etc.”
A iscobèrriri repartus e repartus obertus ma serraus po custus malàdius funt stètius issus etotu. Si ndi funt agataus presentendusì a is controllus o telefonendi in repartu. Difatis, denuntziat su movimentu "DONNE LIBERE IN LOTTA PER IL DIRITTO ALLA SALUTE• FÈMINAS LÌBERAS IN LÙTA PRO SU DERETU A SA SALUDE" “Nisciunus ddus at avisaus!”
Malàdius abandonaus a su scoramentu e a sa timòria, chi sunfrint is crititzidadis de sa sanidadi pùblica sarda, dimandant a is Direzionis Sanitàrias competentis poita in Tàtari e in Sardigna non est stétiu sighiu su mantessi protocollu de sa Lombardia e de su Venetu, regionis chi ant fatu is controllus a is malàidus insoru.
Po custa interrutzioni foras de contu de su serbìtziu pùblicu essentziali su movimentu pedit acramentus a is concas mannas e si lassat sa facultadi de avreguai sa legitimidadi de is detzionis pigadas.