ReForte: birras fatas in Sardigna chi ant unu nùmene e unu sabore ispantosos

Dae sos sartos de Benetuti unu birrifìtziu chi torrat onore a una bella paristòria
9 Maju 2020
ReForte birrificio agricolo

* Dae sa terra a sa butìllia * - Una realidade produtiva chi at pagu tempus de vida. "ReForte birrificio agricolo", difatis, biet sa lughe in su mese de abrile de su 2018.

Semus in Benetuti, una biddighedda in provìntzia de Tàtari. Est inoghe chi agatat sa domo sua su birrifìtziu de Roberto Sanna, unu homebrewer chi at trasformadu sa passione sua pro sa birra in una faina interessante meda.

Su nùmene puru de custu birrifìtziu est interessante meda: est unu nùmene chi lompet nos dae sa paristòria. "ReForte" si giughet in una Sardigna indedda e màgica, sa de sos gigantes.

ReForte fiat unu de issos. Biviat in su sartu de Benetuti e aiat comente amigu un'àteru gigante, Seraghine. Nointames s'amistade manna, su caràtere egoista de ambos non fiat bastadu a los tènnere unidos. Gosi custu ligàmene mannu fiat bènnidu a mancare, e fiat gherra tra ReForte e Seraghine. Una gherra de annos e annos bìnchida dae ReForte, mentres Seraghine moriat ochidu. Rughende in giosso de sa badde Seraghine aiat dadu vida a unu fossu mannu meda. Est unu fossu chi totus sos ierros si prenet de abba. In amentu de custa amistade, però, Seraghine aiat àpidu un'interru monumentale, comente si faghet cun sos inimigos prus importantes. Colende sos annos, s'erèntzia de sos gigantes si fiat ispèrdida. Semper e cando, in sa memòria at lassadu sos nùmenes de sos logos in ue aiant bìvidu. Sos restos de sas domos chi los ant acollidu a pustis de èssere mortos ant leadu su nùmene de tumbas de sos gigantes.

birre ReFortePro torrare onore a custu contu Roberto Sanna at batijadu su birrifitziu cosa sua cun su nùmene de su gigante binchidore. Binchidoras sunt puru sas bèvidas a firma ReForte, birras bonas e famadas chi sunt fatas pro su prus cun s'impita de ingredientes produidos dae s'azienda agricola de su birrifìtziu, est a nàrrere cun su lùpulu e s'òrgiu de domo etotu.

Sas propostas de Sanna sunt etichetas chi s'ispirant massimamente a sa cultura anglosassone. A lu dimustrare sunt sos bator tipos de bèvidas in produtzione a tempos de oe. Sa Mama 'e su Sole est una English Golden Ale; Sa Survile est una English Pale Ale; Su Boboti est una Mild Ale e S'Abba a sa Roda est una Session Ipa.

Comente si podet averiguare sunt totus birras cun una trata ingesa chi faghent bènnere su disìgiu de las bufare.

.

 

 

 

 

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu