Azienda Abele Melis: sa mamma de "Terralba Dominariu" e àteros binos primorosos

* Dae sa terra a sa butìllia * - Est nòdida pro su binu "Terralba Dominariu", una bèvida niedda fata cun àghina autòctona, una de sas etichetas primorosas produidas dae s'azienda Abele Melis de Terraba, una de sas zonas de bìngias prus bellas de sa provìntzia de Aristanis.

Pesada in su 1936 dae su bingiateri terrabesu Abele Melis, gràtzias a sa passione e a sa seriedade de su traballu suo, custa realidade produtiva campidanesa at otentu s'aprètziu mannu de s'imprenta ispetzializada, chi non mancat de la bantare e de dare importu a sa calidade de sos binos suos donende una manu de agiudu pro los fàghere connòschere e apretziare.

No est pro nudda ca in sos ùrtimos annos sos binos de sa cantina Melis ant batidu a domo prèmios e reconnoschimentos importantes, comente sa "Menzione ad Honorem" de sa "guida Vinibuoni d'Italia". Semus faeddende de sos matessi prèmios e reconnoschimentos chi l'ant introduida in su mundu de sos binos estremados.

Non est acabada inoghe. Essende una realidade vitivinìcola intre sas prus importantes de sa provìntzia de Aristanis, s'azienda Abele Melis ddant insertada peri in sa "Guida Vini" de "Quattrocalici".

Un'aventura, sa de Abele Melis, chi bantat nùmeros importantes: 6 bìngias pro unu totale de 30 ètaros coltivados pro su prus cun ratzas de bide autòctona. Muristellu, Muristellu sardu e Vermentinu. Posca ant agiuntu sas bides de Cannonau, Malvasia Sarda e Muscadu. Lent parte a sa produtzione fintzas su Sangiovese e su Chardonnay, duas bides istràngias.

Cun sa voluntade de produire binos chi espressant bene su terroir terrabesu, sos Melis ant atretzadu sa cantina de sas mègius tecnologias, est a nàrrere sas tecnologias chi respetant s'àghina e sas bìngias allevadas.

Isteddu de sa produtzione de Abele, comente atzinnadu, est su binu "Terralba Dominariu". Pro cumprèndere s'importantzia de custa bèvida bastat a pensare ca s'azienda imbutillat pagu prus o mancu de 15000 ampuddas feti de custu binu. "Terralba Dominariu" est un'eticheta caraterizada de unu resuzu tzucarosu e alcòlicu su tantu giustu e de un'agrura fissa bona meda, chi contribuit a dare importu a sos nuscos e a los mantènnere in sos annos.

A fàghere cumpangia a "Terralba Dominariu", tra sos binos de sa sèrie "Vini Melis Tradizionali" agatamus sos nieddos "Triagus", "Horreum", "Nabj" e "Lauremtum", e sos biancos "Iocalia", "Ereb", "Dea Orante" e "Osea". Faghet parte de custa sèrie puru s'abardente Nabj, unu fil'e ferru de àghina Muristellu chi Abele Melis cumbidaiat in sos pràngios a pustis de sa binnenna.

Semper e cando, sa produtzione de sos binos a firma Melis sighit cun un'àtera sèrie de etichetas: sa "Vini Melis". Intre custas etichetas ddoe at biancos che a su "Melis Moscato", su "Melis Malvasia", su "Melis Vermentino" e su "Melis Moscato di Cagliari"; sunt imbetzes nieddos su "Melis Terralba", su "Melis Cannonau" e su "Melis Tharros".

Onni ampudda costoit s'istòria de unu sabore chi sighit fitianu dae una generatzione a s'àtera.