“Azienda Agricola Antonella Corda”: binos primorosos fatos sighende una produtzione sostenibile

Bator binos elegantes: bèvidas chi espressant bene sas caraterìsticas de sos sartos de Serdiana
18 Làmpadas 2020
azienda agricola antonella corda

* Dae sa terra a sa butìllia * - At otentu su reconnoschimentu de “Cantina Emergente -Vini d'Italia 2019” dae su Gambero Rosso. Est una realidade vitivinìcola chi at su nùmene de sa mere sua, un'agronoma giòvana e cumpetente. Est s'“Azienda Agricola Antonella Corda”, chi s'agatat in localidade Pranu Raimondo in Serdiana, bidighedda de su Patiolla a pagu chilòmetros dae Casteddu, tzentru agrìculu insertadu in unu territòriu coltivadu a bides, olia e trigu.

S'istòria de custa cantina est ligada a forte cun cussa de sa famìlia de Antonella. Sa pitzoca, difatis, pertennet a una traditzione familiare de bingiateris. Gosi, dae sa mamma at eredadu s'amore pro sa terra, dae su babbu cussu pro su traballu. Cando, in su 2010, custa giòvona at otentu sa ghia de s'azienda de famìlia, at cumintzadu a pònnere in òpera unu progetu mannu e innovativu: sa realitzazione de una “boutique winery” capassa de produire binos sardos primorosos, bèvidas bonas a rapresentare su mundu de sas terras de su Patiolla.

Su seberu de Antonella Corda est istadu pastinare bides noas coltivende àghinas autòctonas in bìndighi ètaros de terras. Sas bìngias sunt duas: sa de Mitza Manna, coltivada cun Nuragus de Casteddu e cun àghina Vermentinu, e sa de Mitza S'Ollastu, coltivada a Vermentinu e Cannonau.

nuragus corda

Una coltivatzione chi sighet passu passu sos printzìpios de sa produtzione sostenibile, cun atziones programmadas de lota biològica, s'impreu de energia rennovàbile, ladaminamentos orgànicos.

Sas prendas chi naschent dae su traballu in bìngia e in cantina sunt binos elegantes meda, bèvidas chi espressant bene sas caraterìsticas de sos sartos de Serdiana.

In diri de oe s'“Azienda Agricola Antonella Corda” produit bator ampuddas, una prus bona de s'àtera. Sunt unu “Vermentino di Sardegna D.O.C.”, bèvida chi at sabore de flores e frùtora e est fatu cun àghina Vermentinu chentu pro chentu; unu “Nuragus di Cagliari D.O.C.”, bonu meda a lu bufare cun màndigos de mare; unu “Cannonau di Sardegna D.O.C.” chi pasat in carradas de linna e costoit aromas de frùtora ruja, de rosa e de pibireddu biancu e, in fines, un'“Isola dei Nuraghi I.G.T.” chi at unu nùmene bellu, su “Ziru”, binu chi presentat sos nuscos e sos sabores de sas mellus àghinas de su Patiolla.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu