S'azienda “Orgosa de Musina Giuseppe”, sa primu realidade chi in Orgòsolo at produidu binos in ampudda

* Dae sa terra a sa butìllia * - Si narat “Orgosa de Musina Giuseppe”. Est, comente si podet cumprèndere dae su nùmene etotu, una cantina chi at sa domo sua in Orgòsolo, bidda in ue, tocat a lu narrere, cussa de Giuseppe Musina est istada sa primu realidade chi at produidu binos in ampudda.

S'azienda, cun tres ètaros de terrinos coltivados a bide e àteros duos impreados pro fàghere olia e pro s'ortu, produit binos ùnicos, chi ant àpidu reconnoschimentos importantes. Sunt bèvidas otentas pro more de sa passione e de s'esperièntzia de su bingiateri chi las produit, chi passu passu sighit sos traballos in bìngia e in cantina.

Sos terrinos chi donant vida a sos binos cun eticheta Orgosa s'agatant in sa badde de Locoe e in sa de Sorasi.

S'impignu pro su rispetu de sa natura at marcadu su caminu de Giuseppe, chi pro produire binu sighit sa coltivatzione biològica e sa biodinàmica puru. Difatis, in custa azienda chi est nàschida in su 2002 non s'impreant agentes chìmicos e sas madrighes sunt autòctonas. B'est finas de nàrrere ca sa coltivatzione biodinàmica si faghet cun sa semenadura de trigu e legùmenes e pro curare sas matas si impreat feti sùrfuru ramadu.

Onni annu Giuseppe Musina produit tra sas otu-mìgia e sas noe-mìgia ampuddas. Sas bèvidas suas sunt fatas mescamente cun àghina Cannonau ma su bingiateri coltivat àteras bides autòctonas puru. In sas bìngias cosa sua, difatis, bi sunt finas bides de Carignanu, de Pascale e de “Sangue di Cristo”.

Sos binos produidos dae Giuseppe sunt ses in totu: s'“Orgosa Cannonau di Sardegna D.O.C.”, chi est fatu cun àghina Cannonau chentu pro chentu; s' “Orgosa Cannonau di Sardegna D.O.C - Riserva”; su “Nero di Orgosa”, unu binu nieddu otentu dae s'unione de àghina Cannonau, de Carignanu e “Sangue di Cristo”; su “IGT Rosato di Orgosa”, fatu cun s'otanta pro chentu de àghina Cannonau e, in fines, unu binu biancu: su Granatza.

B'est pagu de nàrrere: onni ampudda meresset una bufada!