Sos "Poderi Parpinello": in S'Alighera sos binos pretziosos produidos cun esperièntzia e passione manna

Bèvidas mastrinas importantes chi ant otentu arreconoschimentos e prèmios in su mundu vitivinìcolu
25 Làmpadas 2020
poderi parpinello

* Dae sa terra a sa butìllia * - S'agatant in S'Alighera in localidade Janna de Mare. Sunt sas bìngias de sos "Poderi Parpinello", realidade agrìcola importante chi donat su nùmene a sa cantina cosa sua.

Faeddamos de una azienda chi at un'istòria familiare longa tres inzènneros. Gosi, dae chimbanta annos, sos contos de sa famìlia Parpinello adobiant sos de sa cantina. Sa punna est istada dae semper una feti: produire binos de calidade, bèvidas bonas chi costoint caraterìsticas dislindadas.

Cun s'obietivu de fàghere etichetas capassas de valorizare sos frutos de sa massaria de Sardigna, s'azienda at impiantos modernos e traballat sa terra e sos frutos suos rispetande sa traditzione e su produtu tìpicu. Mescamente sa passione est istada unu tra sos elementos fundamentales pro otènnere sos prèmios e arreconochimentos meda bìnchidos dae sos binos "Poderi Parpinello".

In diri de oe, custa azienda vitivinìcola contat binti ètaros de terras e est ghiada dae Giampaolo Parpinello, un'enòlogu espertu, e dae su fìgiu Paolo. Sas bides sunt istadas pastinadas in unu sartu in ue sos terrinos sunt adatos pro sa produtzione de s'àghina. A inghìriu de sas bides bi sunt matas de olia chi faghent ollu bonu.

Non est acabada inoghe. Difatis, tocat a nàrrere puru ca sos Parpinello allevant sas bides issoro cun atentzione e rispetu pro s'ambiente.

binos parpinello

Dae un'esperientzia de mesu sèculu sunt duncas nàschidas ampuddas famadas, binos nieddos e biancos primorosos chi sighint sa produtzione in bìngia. Una produtzione fata de àghina Cannonau, de Vermentinu, de Cagnulari e de Monica. Ampuddas comente suCannonau Riserva”, unu binu carcu chi at 18 grados de alcol, e suSan Costantino”, àteru Cannonau chi si distinghet pro èssere una bèvida elegante e pro àere un'istrutura bona cun sabore de frùtora ruja, sunt tra sa prendas pretziosas de custa azienda. Difatis, in su 2018, pròpiu su “San Costantino” at otentu sa medàllia de oru in su Berliner Wein Trophy.

In sa sèrie de sos nieddos non mancat unu “Cagnulari - Isola dei Nuraghi IGT”, chi acumpàngiat bene sos màndigos de petza ruja e de catza, e unu “Monica”, chi cun sos nuscos suos de frores est bonu a lu bufare pro su gustu echilibradu.

Sa cantina est nodida puru pro sa produtzione de binos de Vermentinu. S'"Ala Blanca" at 8 grados de alcol, costoit unu saboreddu de mèndula marigosa e est bellu a lu tastare cun màndigos de pische e petza bianca, mentres su "Sessantaquattro" si distinghit pro sos nuscos suos elegantes meda. Est unu binu importante, chi naschet dae budrones isseberados cun incùriu.

Totu custas ampuddas ant bìnchidu prèmios e sunt connòschidas in su mundu vitivinìcolu.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu