Su “Birrificio Alguer” de Uri: unu traballu mastrinu pro fàghere sas birras Dolmen

Un protzessu de produtzione chi est sighidu passu passu, dae s'isseberu de sos ingredientes finas a cussu de sas ampuddas
11 Làmpadas 2020
dolmen birras

* Dae sa terra a sa butìllia * - Su nùmene de s'eticheta est Dolmen e ammentat monumentos neolìticos tra sos prus imponentes e ispantosos chi amus in Sardigna. Semus faeddende de sa birra produida dae su “Birrificio Alguer s.r.l”, realidade produtiva mastrina chi at sa domo sua in Uri e chi in sos ùrtimos annos at traballadu bene faghinde bèvidas de calidade manna.

S'istòria de custu birrifìtziu est cumentzada in su 2005 in sa biddighedda de sa Nurra, intro de unu laboratòriu modernu. Dae cussu momentu a oe su protzessu pro fàghere sas birras Dolmen benit sighidu passu passu: dae s'isseberu de sos ingredientes finas a cussu de sas ampuddas in ue pònnere sas diversas bèvidas produidas.

S'abba impreada est abba pura chentu pro chentu; sos lùpulos, sos maltos e sas madrighes sunt frutu de una seletzione pretzisa. Totu su chi si faghet intro de su laboratòriu, difatis, at una punna feti: sa chirca de un'echilìbriu giustu tra s'ispuma, s'istrutura, sos nuscos de sos lùpulos e su sabore marigosu de sa birra. Su resurtu est sa produtzione de bèvidas chi non sunt coladas e pastorizadas, birras chi costoint sos sabores bellos de sa terra sarda.

Dae su 2017 a su 2019, su “Birrificio Alguer s.r.l” at pòdidu godire de un'isbursamentu de dinari de sa Regione Autònoma de Sardigna pro fàghere traballos de ammanniamentu intro de su laboratòriu in ue si faghent sas birras. Custa est istada un'ocasione importante, pro ite at permìtiu de dare inghitzu a una fasa de crèschida de sas atividades de s'azienda de Uri.

birras Dolmen

Sas bèvidas, bèndidas intro de ampuddas o intro de tambulanas, sunt ses e sunt una prus bona de s'àtera. Sa Dolmen Pils, chi leat su nùmene suo dae sa tzitade de Pils, at chimbe grados e unu colore de oro, aromas ricos e nuscos de maltos. Sa Dolmen IPA est una birra in istile Ale inglesu, at prus de chimbe grados e un'aroma de frùtora, mentres sa Dolmen Blanche est una bèvida cun un'ispuma bianca che nie; sa caraterìstica prus importante de sa retzeta sua est ca tra sos ingredientes non bi sunt lùpulos. Custos, difatis, sunt remplasados cun spètzias comente su coriandru o cun su sabore de su corzolu de s'aràngiu. A sighire, sa Dolmen WEIZEN, una birra in stile WEIZEN chi si faghet cun maltos de òrgiu e trigu sena de maltu, una bèvida primorosa, echilibrada, bella frisca, chi at unu colore grogu comente s'oro e chimbe grados de alcol. Sa Dolmen ALE, imbetzes, est una birra traditzionale a colore de oro antigu e riflessos de pinnadellu. In fines, agatamos una birra ruja, sa Dolmen Bock, chi apartennet a sa famìlia de sas Lager, chi ant orìgines in sa Germania medievale.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu