"Vigne Surrau": in sa tassa nuscos e sabores de Gaddura

Sa cantina gadduresa chi acasàgiat sos bisitadores suos pro fàghere connòschere sas bìngias e sos impiantos
23 Làmpadas 2020
vigne surrau

* Dae sa terra a sa butìllia * - Sunt binos nàschidos pro fàghere connòschere e gustare sos nuscos e sos sabores de sos terrinos de Gaddura in totu su mundu. Semus faeddande de sos produtos de s'azienda “Vigne Surrau”, chi leat su nùmene suo dae in sa Badde de Surrau, tra is sartos in ue sunt istadas pastinadas sas bides chi donant vida e traballu a sos impiantos de sa cantina.

Custa realidade produtiva est istada pensada e aprontada pro acasazare totus sos òmines e sas fèminas chi ant su disìgiu de fàghere una bìsita intro sas bìngias suas e de bìere sos impiantos de sa cantina.

S'acasazu est difatis una règula importante intro de custa azienda. Gosi, pròpiu pro acollire sos bisitadores, in bìngia e in cantina est totu abertu sena de làcanas e su fràigu de sa cantina etotu est istadu progetadu pro intrare in armonia cun sa natura chi creschet totu a inghìriu. Totu cosas chi faghent de custu unu logu semper bellu a lu bìere e lu connòschere.

Sas terras coltivadas dae custa realidade produtiva gadduresa sunt chimbanta ètaros in totu. Chimbe sunt sas ratzas de bide allevadas: Vermentinu, Cannonau, Carignanu, Muristellu e Cabernet Sauvignon.

Su sartu in ue s'agatant sa matas est tocau dae su Bentuestu e caentadu dae su sole. Sunt duas caraterìsticas importantes pro s'ambiente, pro ite donant profetu a s'àghina; duncas lu dant a su produtu finale puru: sos binos.

Sas etichetas produidas dae sas “Vigne Serrau” funt bèvidas giai famadas in su mundu vitivinìculu pro àere àpidu arreconnoschimentos e prèmios importantes meda. S'ùrtimu de sa sèrie est de ocannu etotu: sos “Tre Bicchieri Gambero Rosso Vini d'Italia 2020”, bìnchidu dae su binu Sciala, unu “Vermentino di Gallura” de su 2018.  

binos surrau

Custa Cantina at una produtzione manna, cun binos biancos, binos rosados, nieddos e spumantes.

Tra sos biancos su Branu est unu “Vermentino di Gallura D.O.C.G.” cun 13,5 grados de alcol, su Sciala est unu “Vermentino di Gallura D.O.C.G. Superiore” cun 14 grados, mentres su Sciala VT  est unu Vermentinu chi si faghet cun una binnenna trigadia e pasat in ampuddas pro unu tempus de noe meses. Tra sos Cannonau b'est su Rosè, unu rosadu fatu cun àghina Cannonau chentu pro chentu, e su Sincaru, binu nieddu chi, primu de intrare in sas ampuddas, pasat pro diversos meses intro de brassas de tzimentu e carradas de linna. Tra sos nieddos agatamos puru unu IGT Isola dei Nuraghi. Est su binu Surrau, chi at 14 grados de alcol.

Sas de “Vigne Surrau” sunt totus bèvidas una prus bona de s'àtera e nos no abarrat àteru seberu: tocat a las tastare!

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu