“Vitivinicola Atzori”: trèighi ètaros coltivados cun bides autòctonas

In sos sartos de Crabras una realidade produtiva chi est unu bantu de sa zona a inghìriu de Aristanis
16 Làmpadas 2020
vitivinicola atzori

* Dae sa terra a sa butìllia * - S'agatat in Crabras e est un'azienda chi produit binos e ògiu. Su sartu contat sessanta etaros de terrinos chi sunt insertados intro de unu territòriu bellu e chi at un balore archeològicu mannu, cun archeologias importantes de edade pre-nuraghina, nuraghina, romana, fenìcia e pùnica.

Semus faeddende de sa “Vitivinicola Atzori”, una realidade produtiva chi, cun una traditzione familiare importante, at su bantu de produire binos de calidade manna.

Intro sos sesanta ètaros coltivados, trèighi sunt pastinados a bides. Sunt feti bides de àghina autòctona: Crannàcia, Cannonau e Nieddera.

Castiande bene a sos passos a dae in antis fatos dae sa cantina de Crabras podimus nàrrere ca s'istòria de sa “Vitivinicola Atzori” est fata de reconnoscimentos e prèmios importantes, otentus mescamente in sos annos Otanta e Noranta de su sèculu coladu.

Sas prendas pretziosas de s'azienda de sa famìlia Atzori sunt bator, duos binos biancos, unu nieddu e unu rosadu. Sunt una crannàcia “Vernaccia di Oristano D.O.C.”, una crannàcia “Vernaccia di Oristano D.O.C. - Riserva”, unu binu “Nieddera della Valle del Tirso” nieddu e unu “Nieddera della Valle del Tirso” rosadu.

Su binu “Vernaccia di Oristano D.O.C.” est fatu de àghina crannàcia chentu pro chentu. Est una bèvida colore de oro cun reflessos de pinnadellu. Sos nuscos suos sunt prus fortes cando su binu cumentzat a imbetzare, su sabore est echilibradu e at 15 grados pagu prus o mancu de alcol. Custu binu est bonu a lu bufare pro acumpangiare durches de mèndula, casu e petza puru.

Su binu “Vernaccia di Oristano D.O.C. - Riserva” at un'istrutura echilibrada e unu nuscu de flores de mèndula e nughedda. Est unu binu carcu chi est bonu pro acumpangiare durches tìpicos sardos.

Su binu nieddu “Nieddera della Valle del Tirso” est su frutu de s'unione de àghinas Nieddera e Cannonau. Su colore est unu ruju carcu, comente carcu est su sabore suo. Custa bèvida, chi at unu gradu tra 12 e 14, s'acumpàngiat bene cun màndigos de petza.

In fines, su rosadu “Nieddera della Valle del Tirso” est unu binu dìligu a sabore de frùtora. Òtimu a lu bufare mandighende pische arrustidu, minestras e supas.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu