Gostolai: binos ulianesos dae su 1988

Binos D.O.C. e I.G.T: propostas ispantosas dae sa cantina de Ulìana
11 Argiolas 2020
gostolai

* Dae sa terra a sa butìllia * - Est nàschida comente realidade vitivinìcola familiare cun sa punna de valorizare s'àghina produida in sas terras de sa bidda de Ulìana. Fiat s'annu 1988 cando sa Cantina Gostolai moviat sos primos passos suos.

Sas bìngias coltivadas dae s'azienda ulianesa sunt pastinadas in localidade Gostolai, de inue derivat su nùmene de su marcu.

Sos binos produidos dae custa cantina ant s'obietivu de fàghere gustare intro de una tassa de binu totus sos sabores e sos nuscos de sos sartos in ue creschent sas matas de sas bides. Matas traballadas cun amore intro unu territòriu chi costoit unu ligàmene forte cun sa traditzione e cun s'ambiente.

Gosi, pro sos de Gostolai su binu non podet èssere unu produtu cummertziale ebbia. Pròpiu pro custa resone, sa produtzione de sos binos a marcu Gostolai est semper acumpangiada dae sa chirca istòrica e sos binos etotu si faghent feti cun s'impreu de madrighes autòctonas, chi contribuint a produire bèvidas màstrinas de primore.

carradas

In die de oe, sa cantina Gostolai, chi est un'eticheta nodida in su mundu de sos binos e chi at otentu prèmios importantes meda pro sas produtziones suas, faghet unos cantos binos cun tzertificatzione D.O.C. e cun tzertificatzione I.G.T.. Non finit inoghe, ca in prus de binos nieddos e biancos s'azienda produit tres grapas puru.

Naschent dae sa passione pro su traballu in bìngia e in cantina su binu “Nepente”, nieddu otentu dae àghina Cannonau e Pascale chi at nuscos carcos e unu sabore elegante, e su “Nepente Riserva”, fatu feti cun àghina Cannonau, un'ampudda cun unu sabore chi non si podet ismentigare.

Tra sos Nepente, sa Cantina Gostolai produit puru su binu "Oliena", bèvida de calidade chi tocat a la bufare una bia in sa vida, su Purpura, chi est un'ampudda chi agradat semper, e finas unu “Nepente Riserva D'Annunzio”. Custu nieddu, a sabore de frùtora e nuscos de flores, ammentat su poeta italianu chi aiat alabadu su binu tìpicu de Ulìana. A sighire, in sa sèrie de sos binos Cannonau D.O.C. b'est su “Sonazzos”, fatu cun Cannonau e Bovale, e su “Frutos”, binu echilibradu chi at unu colore ruju.

Sa proposta de sos nieddos fatos dae s'azienda vitivinìcola Gostolai non presentat feti Cannonau D.O.C., ma si cumprit cun àteras bèvidas ispantosas. Tra custas agatamos “Su Gucciu” e “Sos Usos de una 'la”, nieddos “I.G.T. Isola dei Nuraghi” de primore.

Tra sas prendas de sa cantina ulianesa b'est unu biancu chi at unu nùmene importante, “Su Concordu”, chi at colore de oro cun nuscos de mela e marmellada de baracoco e mandarinu; “Su Cuncordu” est unu binu fatu cun sos frutos de duas bides autòctonas: s'Arvisionadu, una ratza de bide tìpica de su Gotzèanu, e s'Alvarega, un'àghina autòctona de su territòriu de Ottieri.

Sa sèrie de sos biancos presentat àteros nùmenes ispantosos: “Incantu”, “Rosa 'e Monte”, “A Medas annos” e “Cantico”. Sunt bèvidas una prus bona de s'àtera. Binos chi pintant unu Paradisu intro de s'ampudda.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu