Sa Cantina Giba, una prenda pretziosa chi faghet binos elegantes

Ampuddas de terroir nuscosa e de sabore
16 Argiolas 2020
cantina giba

* Dae sa terra a sa butìllia * - Nàschida in su 2013, sa cantina Giba est istada creada a pustis de sos traballos de restruturazione de s'azienda “6Mura”. Sa punna sua est istada luego sa de fàghere una produtzione de calidade.

In diri de oe su Presidente de custa cantina est Giovanni Irde e sa produtzione at domo in sa bidda de su Surcis chi at dadu su nùmene a s'azienda vitivinìcola.

S'idea chi at mòvidu sos primos passos de sa cantina Giba est sa de fàghere produtos de primore, prendas pretziosas produidas dae bìngias chi ant prus de 25 annos. Semus faeddende de bides traballadas cun s'obietivu de produire binos nieddos e rosados dae àghina Carignanu chentu pro chentu e binos biancos dae àghina Vermentinu.

Sa bìngias chi batint su frutu traballadu intro de sa cantina de Giba sunt pastinadas in sos sartos de Giba etotu, ma puru in cussos de Cal 'e Sèda, Sant'Antiogu, Masainas, Nuxis, Arresi.

binos giba

Su binu prus importante de custa azienda vitivinìcola est su “6Mura Rosso”, unu “Carignano del Sulcis Riserva” otentu dae àghina Carignanu chentu pro chentu regorta in terrinos a 50 metros de artària subra de su mare. Sas bides chi produint custa bèvida sunt allevadas a sa sardisca e ant un'edade dae 40 a 110 annos. Su resurtu de su traballu in bìngia e in cantina est unu binu elegante meda, chi at unu sabore carcu e nuscos de frùtora cota.

Su “6Mura Bianco” e su “6Mura Rosato” acostàgiant su “6Mura Rosso”. Sa primu eticheta est unu “Vermentino di Sardegna D.O.C.” bona a la bufare cun màndigos de pische, mentres sa segunda est unu binu rosadu frutu de sa vinificatzione de àghina Carignanu in puresa chi est bonu pro acumpangiare onni tipu de màndigu.

Sas meravìgias de sa cantina Giba non sunt finidas inoghe. Difatis, custa azienda vitivinìcola produit puru sa sèrie “Giba”, chi presentat unu Carignanu “Giba Rosso”, unu Vermentinu “Giba Bianco” e un'àteru Carignanu, su “Giba Rosato”, bèvida adata pro sos smurzos.

Cun ampuddas comente custas, sos prèmios e sos arreconnoschimentos otentos non podent ispantare. Pro lu cumprèndere est bastante tastare unu tzicu de cale si siat eticheta tra cussas propostas!

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu