“BAM - Birrificio Artigianale Mogorese”: unu bisu birràiu incumentzadu in unu garage

Birras licanzas chi s'ispirant a sa traditzione clàssica e abbàidant a sa moderna
10 Cabudanni 2020
bam

* Dae sa terra a sa butìllia * - Naschet dae sa boluntade de tres homebrewer, Vittorio Cannas, Matteo Pia e Mirco Meloni, e est unu birrifìtziu màstrinu chi at sa domo sua in Mòguru. Semus faeddende de “BAM - Birrificio Artigianale Mogorese”.

Nàschida in su mese de ghennàrgiu de su 2016, custa realidade brassìcola est su resùmene de una passione chi si mudat in una bella iscummissa. BAM, difatis, est sa coja perfeta tra sa calidade artesanale e sas etichetas artìsticas chi bestint onni ampudda e espressant bene meda su caratere de su birrifìtziu.

Una faina primorosa chi at sas raighinas suas in una produtzione birràia amantiosa. Sa matessi chi est istada sa mòglia chi at fatu cumpartzire s'amore pro sa birra a Vittorio, Matteo e Mirco. Est dae inoghe chi est incomintzada un'aventura interessante, chi faghet godire totus sas nares e sos palados cun nuscos e sabores licanzos.

Posca de unos cantos annos de traballu in unu birrifìtziu piemontesu, in ue sos sòtzios ant afortiadu sas cumpetèntzias issoro, sos tres homebrewer ant fundadu BAM.

bam

In die de oe, su birrifìtziu, fìgiu de unu garage in ue sa birra fiat fata cun istrumentos realizados dae sos tres sòtzios etotu, est un'istrutura chi at unu repartu de ammostamentu de 300 litros - in ue s'acumprit su traballu de sa birra - e una cantina de 4800 litros. Est in custu impiantu chi si produint sas etichetas BAM. Sunt bèvidas chi s'ispirant a sa traditzione clàssica e chi abbàidant puru a produtziones prus modernas, comente s'Italian Grape Ale. Lu faghent impreende bides autòctonas comente s'aghina mogoresa Semidano.

Est gosi chi su mercadu s'arrichit de produtos de primore. Onni birra BAM, difatis, est capassa de conchistare su mundu de sos amantiosos chi non si cuntentat cun facilidade.

Su de custu birrifìtziu est unu catàlogu ricu de propostas de non pèrdere. Est gosi chi proponet una Pils, sa “Blonde Explosion”, un'American Pale Ale, sa “Red Explosion”, una Belgian Dark Ale, sa “Winter Explosion”, una Pils cun Dry Hopping, sa “Spring Explosion”, una English Ale, sa “One First Explosion” e, infines, un'Italian Grape Ale, sa “Wine Explosion IGA mogoresa”. Est una birra incubonada pro tempus meda e aromatizada cun àghina Semidano, un'eticheta chi ispantat e chi est produida cun s'agiudu de sa “Cantina sociale il Nuraghe”.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu