Jadas: una birra licanza produida cun s'abba granitica de Gaddura

Unu progettu birràiu chi abbaidat a largu
3 Cabudanni 2020
jadas

* Dae sa terra a sa butìllia * - Est una birra gadduresa, si cramat Jadas e su nùmene suo derivat dae sa denominatzione antiga chi aiat su bidditzolu de Boltizadas (Bultiggjata in limba gadduresa), a curtzu a su Limbara.

Dae custa bidda, prenda de sa Gaddura, naschet s'abba granitica impreada pro sa produtzione de sas ampuddas Jadas.

S'abba, bogada a unos 200 metros de profundidade, gràtzias a sas rocas de granitu est impreada sena bisòngiu de dda filtrare. Difatis, sunt pròpiu sas rocas chi s'agantant in suta de terra a fàghere de filtru e a donare a sa produtzione Jadas un'ingrediente birràiu chi at una mineralidade importante. Sas caraterìsticas de s'abba isseberada faghent de Jadas una bèvida originale e de caratere. Una birra capassa de contare bene su territòriu ispantosu de sa Gaddura.

Sa retzeta chi at fatu bìdere sa lughe a custa Blonde Ale, fàtzile de bufare e bene bilantziada, est fìgia de su chef famadu Gianfranco Pulina, duncas naschet intre sos muros de su Golden Gate, s'hotel ristorante de primore in ue Pulina traballat dae 20 annos pagu prus o mancu.

Pulina, chi connoschet bene su mundu de sa birra, paris cun sos sòtzios suos, Antonello Zedda, mere de su ristorante “Vecchio Mulino” de Altzaghèna (Alzachèna in gadduresu) e cun s'imprendidora nautica Laura Fiori, cun Jadas at dadu vida a un'eticheta chi nde bogat su mègius de sos nuscos e de sos sabores de Gaddura.

Produida dae su birrìfitziu màstrinu Chemu de Casteddu, Jadas est una birra beverina in istile Belga chi at àrvios lèbios de agrumes e de mele. Perfeta pro la bufare paris cun mandigos de mare cruos, est òtima comente aperiente e pro acumpangiare sas retzetas de sa traditzione sarda.

Una birra primorosa e licantza, una bèvida famada e chircada meda in Monti di Mola.

Semper e cando, custa birra màstrina de Gaddura - bèndida in ampuddas de 75 e 33 chi giughent su tapu sigilladu cun cherispagna -, est dimandada puru dae unu bellu nùmeru da pub inglesos, americanos, frantzesos e dae numerosos tzilleris de sos paisos de su cabu de susu europeu.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu