Una realidade produtiva sarda resessida: sa Cantina Su'entu de Seddori

Prèmios e reconnoschimentos pro binos de terroir fatos cun passione e respetu pro s'òmine e sa natura
12 Cabudanni 2020
su entu

* Dae sa terra a sa butìllia * - Leat forma dae unu bisu lìberu comente su bentu e dae su bentu leat su nùmene suo. Est una cantina de primore, s'agatat in Seddori e si cramat pròpiu Su'entu.

Dae custa azienda vitivinìcola de sa Marmidda naschent produtziones de terroir pretziosas e raras, ricas comente sunt ricos sos nuscos de sa terra de Sardigna.

Fìgia de un'idea de Salvatore Pilloni, dae su 2009 custa cantina at sa punna de valorizare sos terrinos antigos. Sunt terrinos, sos de su montigru marmiddesu, prenos de istòria e traditziones, ma sunt finas su sartu perfetu pro coltivare sas bìngias. Difatis, in 80 ètaros de terra de propriedade de cust'azienda, 32 ètaros sunt pastinados a bide.

Totus sos traballos in su sartu sighint su printzìpiu de s'agricultura sustenìbile de su puntu de annotu ambientale e sotziale.

Onni bèvida est un'eticheta màstrina chi s'identificat semper pro mèdiu de su nùmene de s'azienda. Un'azienda in ue si coltivat àghina bianca Vermentinu, Muscadellu, Nascu e Chardonay, e àghina niedda Muristellu, Cannonau. Monica, Cagnulari, Merlot e Syrah.

su entu

Totus sos binos produidos dae sa Cantina Su'entu sunt su frutu de unu traballu de iscuadra. Un'iscuadra fata dae un'enologu e dae massajos e operajos chi traballant cun amore pro mudare s'àghina in binos ùnicos e licanzos. Sas de Su'entu sunt bèvidas de calidade manna chi conchistant onni paladu, peri cussos de sos amantiosos prus espertos.

A isgloriare sos palados sunt duos Ispumantes - “Su' Bri” e “Su' Brie Rose” -, unu binu rosadu - “Su' Nina Rosè”-, unu passito - “Su' Luci”-, sos tres biancos - “Su' Imari”, “Su' Orma” e “Su Aro” -, e sos bator nieddos -“Su' Diterra”, “Su' Anima”, “Su' Oltre” e “Su' Nico”.

Famada meda, in 2020 sa Cantina Su'entu at leadu a domo unos cantos de prèmios e de reconnoschimentos. L'agatamus in sa “Top 100” de su “Merano Wine Festival” cun “Su' Oltre”, unu “Marmilla IGT” de su 2016; est binchidora de su su prèmiu “Gold” in su “The Wine Hunter Award 2020” cun su “Su’Oltre - Marmilla Rosso IGT 2017” e de su “Rosso” cun su binu “Su'Anima”, unu Cannonau de su 2018. At bìnchidu finas un'àteru “Golden” in su “The Wine Hunter” cun “Su' Nico”, Bovale Marmilla Rosso IGT de su 2018, e at leadu àterus duos reconoschimentos pro “Su' Oltre Marmilla Rosso IGT” de su 2016 e su “Su' Oltre Marmilla Rosso IGT” de su 2017. Non est totu. Sa Cantina at otentu puru sa “Corona” de sa “Guida Vini Buoni d'Italia” pro su nieddu “Su' Anima”, unu Cannonau Sardegna DOC de su 2017, mentres pro “Su' Imari”, unu “Vermentino di Sardegna D.O.C.” de su 2018 at conchistadu sa medàllia de prata in su “1° Concorso Internazionale Vermentino 2020”. In su matessi cuncursu at otentu sa medàllia de oru cun su binu Vermentinu “Su' Orma” de annada 2017.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu