Sa vida est inghitzada in su mari e s’at a mòrriri in su mari, prenu de àliga?

Unu reportage de interessu mannu a incùriu de Francu DeFabiis
3 Gennàrgiu 2021
cubertonis

Totu est cumitzau una pariga de dias apustis de su mari grussu de su 6 de Friaxu de su 2013, biei e ascurtai strechendi innoi s`arresumiu de ita fiat sutzèdiu in totu su Poetu de Castedhu e de Cuartu.

Aici mi seu dètzidiu e apu cumintzau a bodhiri, fotugrafai, totu “cust`àliga” in sa pràja  e apu sighiu fintzas a de oi. Fintzas in custas dias, de su mesi de Idas 2020, seu arrennèsciu a bodhiri casi unu cuintali de matonis a su Poetu: a sa Primu firmada, a s`intramesu de su Dàcuila e su Lidu, a su Lidu, a sa Cuarta frimada, a s`Uspidali marinu, a sa Bùssola, a su Lidu mesuterràneu e a Mràxini arrùbiu. Totu pigau a bellu a bellu in custas dias de soli stravanau.

E in totus custus set’annus annus ita totu nd`apu bodhiu?

Prus de cuàturu tonelladas e mesu de matonis sardus. In totu prus de duus mèturus cubus, prus de duxentus cincuanta càscias de cudhas po sa birdura prenas chi bideis in fotus tiradas in domu de mei. Is duus sedilis chi apu agiudau a fraigai in sa coxina de mei cun su maistu de muru tirant in totu 0,70 mèturu cubu, in totu casi 80 càscias. Casi sexentus matonis intreus e prus de cuàturumilla in arrogus a mitadis o in sa de tres partis.

Prus de tremilla sodhus, su prus de unu, de duus e de cincu centèsimus. Prus de cuàturuxentus de duus, de unu e de 0,50, de 0,20 e de 0,10 eurus. Una meca de sodhus bècius de cincuxentu francus, de centu, de cincuanta, de duxentus; sceti calancunu de binti, de dexi e de cincu francus ca funt meda prus lèbius e no si tudant meda asuta de s`arena candu nc`arruint e beniànt agataus illuegus. Totu cudhus culoraus de asuletu o arrubiastus de duus eurus dhus apu donaus in strina, che a medàllias, a amigus e cunlegas de scola. Is àterus donaus in strina a pipiedhas/us, o a Rom chi bendiant calancuna cositedha.

Prus de sessanta cubertonis de arrodas de màchinas, de càmions e fintzas unu de tratori, de vespas e bicicretas. Medas de custus giai segaus in su costau po dhus imperai po arrembronai su stumbai de is barcas fra issas e is banghinas. Difarentziaus cun cun s`àliga manna de domu e in parti in s`insula eculògiga de Terramàini. Duus dhus tengu ancora in domu.

Prus de duxentucincuanta prumus po piscai e duus de sub chi pesànt mesu killu cadeunu. Prus de cuindixi chillus de prumu in totu.
Prus de centu killus de allumìniu, su prus botuledhus de birra, de coca cola e de arangiada; ma apu agatau fintzas pingiadas, padedhas e botuledhus sprai. In totu prus de ses bustonis, de cudhus prus mannus niedhus de pràstiga, totus prenus a cùcuru e cun is botus strecaus beni beni po ndi càpiri de prus. Totu custa sienda est stètia donada in strina po torrai a èssiri bèndia a su ferrubèciu.

Prus de milli cosas in totu: tra crais bècias e noas, aciarinus, anedhus de ferru de prata de arràmini, getonis po su telèfunu pùbrigu bèciu e po is machinedhas de is giogus, medas brutzeris totu culoraus chi faint e/o bendint is ambulantis, cannacas e lòrigas, ullieras, cocerinus, culleras, tassas e gortedhus...etc.
Cuintalis, una pariga, de butìllias de imbirdi.

Casi coranta killus de arroghedhus de imbirdi totu lisaus e bellixedhus medas po fàiri prendas. Totus agataus a Mràxini arrùbiu ca in su Poetu no si nd`agatant prus. In domu ndi tengu unu scartedhu e unu cadinu prenus. Nd`apu donau in strina, is prus stravanaus, a duus pipius che prendas.

Una pariga de cuintalis de pràstiga: butìllias, casidhus, tassas, bustas, tapus, puntas de ombrellonis, pratus etc...

Casi unu cuintali de paperi e cartoni.

Cuintalis e cuintalis de àliga manna meda o de fuliai chentza de dha pòrriri difarentziai: unu càmbiu de màchina, una bòmbula manna de scaldabànniu, unu mantalafu pigau e carrigau in s`imperiali, peluches, mallionis, pantalonis, giaconis, butinus, migias, bussas de tela, de pedhi, bàmbulas, una meca de arrogus de barcas de arresinimbirdi e carramatzinas varias...etc...

Tres burtzeris di oru e duas lorigas sèmpiri di oru, donaus in strina a un`amigu e un`amiga po is fillus. Deu mi seu aguantau sceti su brutzeri di oru agatau in sa pràja de ex capolinea de su QS de is annus setanta. Custu ndi dh`apu bodhiu a suta de s`àcua ca femu acabussendi po circai àliga e matonis. De cust`ùrtimus innia nd`apu agatau una meca ca in acabbu de s`istadi nci fuliànt, a sa scusi de totus cun s`arruspa in s`àcua, s`àliga chi fiat amuntonada in s`arena bodhia in totu sa stagioni.

Unu scantus Cuintalis de arretzas de piscadoris sbertuladas in sa pràja po mori de su mari grussu. Andamu e cun is tanallas e ferrus de eletricista dhus segamu, aici apu fatu in tres arrogus fintzas unu truncu de arretzas prus longu de unu mèturu e mesu, grai e grussu meda.

Kilomèturus e kilomèturus de lentzas totu allumburada, ma chi imbrutant meda sa pràja, medas cun is paraduras prenas de gamus perigulosus po is peis e is manus de chini si stòjat in s`arena.

Millis e millis cicas de sigaretas, custas circadas e bodhias sceti in is duxentus mèturus de sa pràja aundi andu e mi fatzu su bànniu, medas scavuladas de is piscadoris e medas lòmpias cun is undas e sa currenti de su mari candu s`ingrussat.


Totu sa cosa bodhia e pinnigada in sa pràja dha scutulamu beni beni de s`arena e dha illichidemu in s`àcua de mari e aici lìmpia dha ponemu, in bustas, bussas e sachitas, aintru de sa màchina de mei po ndi dha fàiri bodhiri in sa difarentziada.
Su domìnigu bessemu cun duna bussa de aràngius e faemu a peis, e totu oru oru de mari, in cincu oras de Mràxini arrùbiu a sa Primu firmada de su Poetu e torrada. Mi frimamu a tretu de mesu de su biaxu sceti unu pagu po torrai sulidu e mi pasiai e po mi papai is aràngius che a unu papa e bufa e furriamu a domu.


Est de no nci fuliai nudha, ni in su mari, ni in sa praja e ni in s`arruga ma totu cudhu chi fait a torrai a imperai, e s`arricicrai non est àliga ma una sienda po sa sotziedadi.


francudefabiis

© RIPRODUZIONE RISERVATA
Tags
Allegati
Image
cudertonis
Image
aterus cubertonis
Image
copertoni2
Image
copertoni
Image
copertini2
Image
guasta
Image
arroda
Image
soddus
Image
aterus soddus
Image
ateru
Image
matoni
Image
arregorta
Image
matoni