Sustenibilidadi: cànnua e ortigu in sa proposta noa de Daniela Ducato

Unu termobiotessile chi non fait passai ni licuidus ni gasus
22 Gennàrgiu 2021
terra

Terra - Nascit de un'idea de Daniela Ducato, s'imprendidora premiada e famada meda po s'amparu de s'ambienti. S'idea noa de Dabiela est rapresentada de unu termobiotessile sutili chi non fait passai ni licuidus ni gasus. Cun una grussària de tres millìmetrus, custu termobiotessile est fatu cun cirronis de cànnua e pimpirinas de ortigu coltivaus in Sardigna.

Sa proposta noa de Edizero - s'azienda de Guspini chi cun sa ghia de Daniela at creau prus de centu produtus innovativus e sustenìbilis - at fatu s'intrada sua in su mercau in su mesi de arbili de su 2020 e, mancai su lockdown, at otentu fama luegu. Cun su termobiotessile “s'imprenditora birdi” at concuistau is mercaus de s'Europa de Tramuntana.

terraMa ita est su termobiotessile? Est unu produtu multiformi, est a nai ca si podit impreai in diversus campus: in su mundu de sa moda, in cussu de s'arredamentu, si podit impitai po fai coscinus po òminis e animalis, cròcias, fronimentus po is palestras, e s'impreat in àterus cumpartus puru.

Unu produtu sustenìbili, duncas, chi est nàsciu gràtzias a s'impreu de is biotecnologias. Unu produtu chi tenit una capacidadi ispantosa si benit impitau cummenti isolanti po su callenti e po su frius e finas unu produtu chi tenit una caraterìstica de importu: sa de difèndiri s'ambienti. Difatis, su termobiotessile nàsciu de sa conca de Daniela Ducato est totu fatu cun is arrefudus de is matèrias primàrgias vegetalis. Est a nai ca po su cumprimentu de su termobiotessile non si bocint animalis, non s'impreat plàstica e nimancu petròliu. Seus fueddendi, duncas, de su traballu de un'industria chi non impestat su territòriu, e chi, a su contràriu, ddi donat valori mannu. Seus chistionendi de una conchista importanti, prusatotu in nd'unu momentu istòricu cummenti su chi seus bivendi, caraterizau de is perìgulus rapresentaus de sa plàstica e de totu is materialis fatus de sa tramuda de su petròliu.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags