"Conoscer-si" 2021: un'editzioni dedicata a sa sustenibilidadi

Is protagonistas de su festival ant èssiri is piciocheddus
23 Fiàrgiu 2021
terra

Terra - Su nòmini suu est "Conoscer-si" e est unu festival dedicau a is giòvanus chi tenint un'edadi de is 11 a is 19 annus e bivint in cunditzionis de discumbèniu.
Est cumentzau s'1 de fiàrgiu passau e at a sighiri fintzas a su 30 de su mesi de martzu 2021.

"Conoscer-si" fait parti de unu progetu prus mannu. Unu progetu chi at a durai po tres annus, chi est amparau de sa "Fondazione di Sardegna" e aprontau de s'"Associazione Enti Locali per le Attività Culturali e di Spettacolo" e de unus cantu comunus e iscolas de Sardigna.

S'editzioni 2021 de "Conosce-si" at èssiri dedicada a unu tema de importu mannu in custu momentu istòricu. Ocannu, difatis, su Festival at a chistionai de sa Terra, de s'isvilupu sustenìbili, ma po finas de su clima e de s'apretu sanitàriu chi at atacau sa vida de totus.

pianeta verdePròpiu po custa rexoni su Festival "Conosce-si" est cumentzau cun sa presentada de su film "Pianeta Verde" de Coline Serreau. Unu film chi costoit unu messàgiu importanti, poita contat su valori de s'incuru de sa terra e sa possibbilidadi de dda bivi a una manera difarenti de cussa chi connosceus: su film ammostat su cuncòrdiu intre s'òmini e s'ambienti.

Po su cumentzu de su festival no est mancau nimancu unu momentu de aprofundimentu ghiau de un'isperta de annestru ambièntali. Is protagonistas? Sèmpiri is piciocheddus. Intre is punnas de s'editzioni 2021 de su Festival, difatis, agataus puru sa produtzioni de un filmixeddu fatu de is piciocheddus chi ant pigau parti a sa dibbata asuba de sa sustenibilidadi e de sa defensa de sa terra.

Is comunus chi pigant parti a "Conosce-si 2021" funt unus cantu. Intre custus ddoi at su comunu de Teulàda, chi at aprontau unu labboratòriu de murales e tzìnema ghiau de s'artista Crisa (Federico Carta) e de su regista Marco Gallus; su de Silius, chi est cuncodrendi unu labboratòriu de sessanta oras ghiau de s'asòtziu "Artisti Fuori Posto"; su de Santu 'Engiu, cun su cursu fatu de sa muralista romana Camilla Falsini; su de Arresi, innoia su labboratòriu de murales ddu ghiat Bastardilla, un'artista chi benit de sa Colòmbia.

Su produtu finali de custus labboratòrius at èssiri sa produtzioni de is murales dedicaus a da terra e a sa natura.

© RIPRODUZIONE RISERVATA
Tags