Sa bellesa e sa saludi sustenìbilis de Iliana

Filla de tres sòtzius, Massimo Ghiani maistru erborista, Giacomina Cocco sòtzia cun cumpetèntzias econòmicas e sotzialis e Gian Luigi Virdis peritu agràriu, Iliana est una sotziedadi coperativa casteddaja chi nascit in Seulu. Una realidadi sustenìbili e acapiada a sa Green Economy, chi traballat is matas meigamentosas. Est sighendi sa filosofia de sa Green Economy ca is tres piciocus sardus, Massimo, Gacomina e Gian Luigi, at donau vida a una filiera cumprida chi amenguat is costus e sa CO2 acapiada a is trasportus.

Sa faina de custa realidadi produtiva comintzat in su 2002 cun s'incùngia de s'alchimissa, de s'erviola e de su tzìpiri, de innoi nascit sa coperatzioni cun aziendas frantzesas e cun aziendas toscanas, chi po s'aromaterapia impitant prusatotu una variedadi de tzìpiri sardu su Verbenone.

In su 2006, Massimo Ghiani giai laureau in iscièntzias polìticas, s'iscririt in iscièntzias e tecnologias erboristicas.

Agoa de ai maturau una connoscèntzia funguda de is produtus, de is propiedadis insoru e de is tècnicas po ddus traballai, in su 2007 comintzat a produiri produtus de fitocosmesi funtzionali.
Oi Iliana coltivat in is terras suas matas tìpicas de su tupedu sardu, est a nai tzìpiri, alchimissa, erviola, muta, sàlvia, ispicu, modditzi e tzinìbiri.

Cun Iliana dògnia cosa benit fata in Sardigna, de s'incugia de is erbas a sa produtzione de is cosmèticus naturalis e sustenìbilis. Difatis, seus fueddendi de una coperativa a Km0, chi avalorat sa produtzioni naturali e chi proponit feti produtus sustenìbilis de calidadi manna.

Is propostas Iliana s'agatant in is erboristerias, in is potecarias e para-potecarias de Casteddu e de sa provìntzia sua, de Aristanis e provìntzia, de Tàtari e provìntzia e de Nùgoro e provìntzia, Is produtus si podint comporai finas foras de Sardigna. In Itàlia s'agatant in Lombardia, Piemonti, Friuli Venetzia Giùlia, Toscana, Làtziu e Puglia. Mentras foras de s'Itàlia si pondit pigai in Rùssia.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22