S'amparu de sa biodiversidadi in sa massaria sustenìbili de Agricura

Produtus de su territòriu fatus cun amori e respetu po s'ambienti e po sa cultura agrìcula de is antepassaus
24 Martzu 2021
terra

TerraAgricura est un'azienda de Gonnos chi s'interessat siat de coltivai e costoiri padentis siat de massaria. Seus fueddendi de una realidadi produtiva filla de un'idea de Andrea Ghiani, un'òmini chi at fatu de sa sustenibilidadi sa rexoni de su traballu suu. A ddu ghiai est s'amori po sa terra, po sa natura e po s'ambienti, e, comenti si podit cumprendiri, sa salvaguardia insoru.

Totus is fainas de Agricura castiant a sa biodiversidadi de sa Sardigna. Aici s'azienda gonnesa fait olia, murta, ortigu, sindria de Gonnos e lioni. Ddus fait pighendi in cunsidèriu sa biodiversidadi culturali de su territòriu e circhendi de poniri a diri is ratzas vegetalis adeguendiddas a is abbitudinis e a is produtzionis de is antepassaus nostrus.

Biodiversidadi, sustenibilidadi, trasparèntzia e sa possibbilidadi de connosciri su caminu de su produtu funt is printzìpius chi movint totu sa polìtica aziendali de su progetu Agricura.

agricuraTotus is propostas produidas de Agricura - de s'ollu ermanu de Gonnos fatu cun sa ratza “Nera di Gonnos” e sa “Bosana” a is ortalissias chi nascint de su recùperu e de s'amparu de sa biodiversidadi, de sa silvicoltura a sa produtzioni de s'ollu de ollestincu, de su fasobeddu Corantinu, ratza tìpica de Gonnos finas a arribai a sa produtzioni de sa sindria gonnesa (famada po èssiri sa sindria prus bona de s'ìsula) e a àteras licantzias - rapresentant produtus de calidadi manna, produtzionis bonas e chi giuant a sa saludi. Una calidadi otenta sighendi caminus e connoscentzias antigas e, mancu a ddu nai, respetendi sa natura, ascurtendi su clima e amparendi s'ambienti.

Passientzia e isetu funt is elementus primàrgius po mandai ainnaintis custu tipu de massaria sustenìbili. Dògnia produtu tenit su tempu suu e po bessiri bellu e sentzeru depit èssiri allevau aintru de un'ecosistema echilibrau, chi sighit su ritmu de su soli e de sa natura.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags