S'impignu de su CTM po sa sustenibilidadi e s'ambienti

Sa flota elètrica: unu progetu de importu mannu
27 Martzu 2021
terra

Terra - Si lamat “Clean Cities” e est unu progetu de Legambiente chi pertocat catòdixi tzitadis de s'istadu italianu. “Clean Cities”, chi est cumuntzau s'8 de su mesi de martzu 2021 e at a andai ainnantis fintzas a su 10 de arbili chi benit, donat atentzioni a sa mobilidadi sustenìbili in nd'unas cantu tzitadis. Sa punna de Legambiente, difatis, est sa de ammellorai sa calidadi de s'ària in is logus innoi bivit genti meda.

Intre is tzitàdis chi pigant parti a su progetu agataus po finas Casteddu, innoia Legambiente est lòmpia su 23 de martzu passau po fai una bìsita ufitziali. S'iscaudra sarda de Legambiente at difatis fatu unu giru asuba de su postali nùmeru 10 de su CTM, unu postaleddu elètricu chi si movit de pratza Costituzione a s'ispidali Binaghi. Asuba de su 10, po acumpangiai Annalisa Colombu e Vincenzo Tiana de “Legambiente Sardegna” ddoi fiant: Roberto Porrà, presidenti de su CTM; Paride Gasparini, diretori de esercìtziu de su CTM; e Stefania D'Arista, responsabbili de is relatzionis esternas de s'azienda de trasportus de sa tzitadi metropolitana sarda.

terraBisòngiat a sutalineai ca Legambiente at giai donau unu votu positivu a su CTM. Casteddu, difatis, s'agatat intre is primus tzitadis aintru de is classificas de “Ecosistema urbano”. E tocat a aciungi puru ca, cumenti at pretzisau Vincenzo Tiana etotu, in is annus colaus su CTM iat giai isperimentau sa mobilidadi sustenìbili cun su postali 5 Zeus. Imoi, perou, is obietivus chi pedit S'Europa funt prus artus meda. Aici totu sa flota de su CTM s'at a depi mudai in flota elètrica intru su 2030. Po ddu fai s'azienda de trasportus casteddaia tenit giai unu progetu chi podit movi cust'operatzioni. Su chi pedit Legambiente, duncas, est chi su CTM fatzat totu prus allestru.

Su progetu de su CTM tenit unu costu de centucincuantases milionis de eurus.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags