Adrià Mor: una cantzone pro sa Die de sa Sardigna

Publicaus custa nota de imprenta dedicada a sa Die de sa Sardigna e a sa cantzoni de su cantautori catalanu Decoloniza·ti, sarda.

In ocasione de sa Die de sa Sardigna (28 de abrile), su cantautore catalanu Adrià Mor at publicadu una versione in cunfinamentu de sa cantzone Decoloniza·ti, sarda, cun sa
collaboratzione de gente de is Paisos Catalanos e de Sardigna.

Sa cantzone faghet riferimentu a sa situatzione polìtica e sotziale de Sardigna, comente sa persecutzione de ativistas indipendentistas o su movimentu contra a is bases militares de s’esèrtzitu italianu, e chircat aici de contribuire a su protzessu de decolonizatzione e de crèschida de s’indipendentismu.

Unas cantas persones ant registradu a distàntzia is coros de sa cantzone in catalanu e in sardu. Pro cantu a is musitzistas, Adrià Mor (boghe e chitarra) est acumpangiadu de Carlos López a sa percussione, Mauro Pes a sa fisarmònica e Fabrizio Piras a su bàsciu.

Decoloniza·ti, sarda faghet parte de Lo somrís de la magrana (‘su risu de s’arenada’; autoeditadu, 2020), su primu album in solitàriu de su cantadore de Bartzellona, in su chi ant partetzipadu musitzistas comente Joan Garriga (Dusminguet, La Troba Kung-Fu, Mariatxi Galàctic) e Marià Roch (Jarabe de Palo, La Troba Kung-Fu), intre àteros. Is cantzones de su traballu — in catalanu de Bartzellona, catalanu aligheresu e sardu — cunformant sa colonna sonora de sa trasmissione Adrià – Beni cun me de RAI3, subra de su patrimòniu linguìsticu e culturale sardu.

Lo somrís de la magrana tenet una lissèntzia Creative Commons e podet èssere iscarrigadu de badas dae su situ web www.adriamusic.cat.