Sustenibilìdadi e arti in Santu Eingiu
Terra - Dd'ant batiau CONOSCER-SI e est unu progetu sustenìbili innoia s'arti benint impitada comenti istrumentu po gherrai contra a su discumbéniu de is giòvanus. Intre is protagonistas de custa faina agataus sa bidda de Santu Eingiu e su murale de s'artista romana Camilla Falsini, un'òpera fata impari a is istudiantis de is iscolas mèdias po promòviri sa rivalorizatzioni artistica de sa bidda.
Cun custa faina sa comunidadi santueingesa at aciuntu unu pagu de colori, arti e bellesa a su logu. Su murale criau de is piciocheddus impari a s'artista arribat a pustis de unu traballu longu duus mesis, incumentzau su 2 de su mesi de fiàrgiu passau e acabau in su mesi de arbili.
S'òpera fait parti de unu progetu de tres annus. Unu progetu chi est istètiu finatziau de sa “Fondazione Sardegna” e est aprontau de s'Assòtziu Entis localis po is Atividadis Culturalis e de Ispetàculu impari a is Comunus e a is iscolas.
Sa punna de CONOSCER-SI est sa de contribuiri a gherrai contra a su discumbèniu sotziali donendi atentzioni manna a is giòvanus chi tenit un'edadi chi andat de is 11 a is 19 annus. Custus giòvanus, difatis, funt istètius trisinaus in fainas de educatzioni artìstica e educatzioni emotiva.
Su murale, fatu in nd'unu muru de s'iscola mèdia, est caraterizau de lìnias istilizadas essentzialis e de coloris carcus e est nàsciu po su prus de is propostas lòmpias de is piciocus.
Non est totu. Is giovunus chi si funt impignaus a pònniri in òpera su murale ant pigau parti po finas a unu laboratòriu de tzinema e cortometràgiu.
Su làboratòriu est incumentzau a pustis de sa presentatzioni de su film de Coline Serreau “La belle verte”, est a nai Pianeta Birdi. De ita fueddat custu film? Mancu a ddu nai: su film fueddat de sustenibilidadi ambientali. Agoa de dd'ai biu, is piciocheddus etotu ant imparau comenti si girat unu cortometràgiu e ant iscritu su sugetu e s'iscenegiàdura de unu film. Custu film at èssiri su resurtu de importu de su traballu ghiau de Fabio Sanna de s'"Associazione Artisti fuori posto".
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
