Prèmiu Andrea Parodi: 31 de su mesi de maju ùrtima diri po s'iscriri a su cuncursu

Sa tzitadi de Casteddu at a aghilliri sa finali
26 Maju 2021
andrea parodi

Mancant pagu diris po s'iscriri a sa 14a editzioni de su Prèmiu Andrea Parodi, su cuncursu dedicau a sa “world music”.

A su bandu, chi s'agatat in su giassu de sa "Fondazione Andrea Parodi" e chi iscadit su 31 de su mesi de maju de su 2021 a is 23.59 (www.fondazioneandreaparodi.it), podint pigai parti artistas de totu su mundu.

S'iscritzioni est gratùita e is dimandas ant a depi èssiri mandas atressu de su format chi s'agatat in su giassu de sa "Fondazione".

A isceberai is artistas chi ant a andai in finali at èssiri una Commissioni artìstica, chi at seletzionai is finalistas chi ant a depi fai connosci s'arti insoru a faci de una Giuria Tècnica e de una Giuria Crìtica.

Su bincidori assolutu de su cuncursu at a pigai parti a is editzionis imbenientis de unus cantu festival partner de su Parodi, est a nai de s' "European Jazz Expo", chi si sboddicat in Sardigna, e de su “Folkfest” friulanu. In prus de custu at otènniri unus cantu buonus e una borsa de istùdiu de 2.500 eurus.

Su bincidori de su prèmiu de sa crìtica, imbecis, at a podi fai unu videoclip professionali cun su branu chi at pigau parti a su cuncursu. In prus at a pigai parti puru a s'editzioni imbenienti de “Mare e Miniere”, un'àteru festival partner de su Parodi.

Sa finali est previdia in Casteddu po s'atòngiu chi benit.

 

© RIPRODUZIONE RISERVATA
Tags