Su comunu de Marrubiu est su primu a pigai parti a su progetu "Plastic Free" de su Flowe Onlus

Sa punna est sa de arregòlliri sa plàstica chi impestat s'ambienti
8 Maju 2021
terra

Terra - Su comunu de Marrubiu at èssiri su primu in Sardigna a pigai parti a su progetu "Plastic free - Liberiamo il mondo dalla plastica", chi s'at a tenni su 15 de su mesi de maju chi benit in su Monti Arci de is 9.30 de mengianu. Po chini bolit pigai parti a s'initziativa s'atopu at èssiri a faci de sa cresiedda de sa Madonna de Zuradili.

Po sa comunidadi de sa bidda in provìntzia de Aristanis custa at èssiri una diri de importu. Su progetu, difatis, fait parti de una proposta prus manna meda, cussa ghiada de s'asòtziu Flowe, una ONLUS nàscia in su 2019 chi est po finas partner de s'iniziativa marrubiesa de su 15 de maju.

terraSa punna de Flowe est sa de informai sa genti asuba de su disacatu chi s'impreu de sa plastica causat in s'ambienti innoia biveus. Non est totu, poita gràtzias a is atzionis de s'asòtziu, in dogna bìculu de su territòriu de s'istadu italianu si funt arregortus prus de cincuxentusessantaduusmilla chilus de àliga chi impestat sa natura e fai dannu a s'òmini puru.

In Sardigna, a s'initziativa de Marrubiu nd'ant a sighiri unas cantu pariga: su 16 de maju, difatis, at èssiri una diri prena de atopus de impignu po s'ambienti. Aici, s'initziativa fata in su Monte Arci s'at a arrepiti in Aristanis, in s'arenargiu de Turri Manna, innoia at a cumentzai a is 10.00 de mengianu; ma ddoi ant èssiri po finas s'atopu de Marceddì, sèmpiri a is 10.00, su de Terranoa a is 9.00, su de Santeru, chi s'at a sboddiai de Is Benas a in 9.30, su de su Poetu de Casteddu a is 10.00, su de S'Alighera a faci de "Su Chalet" a is 10.30, su de Lunamatròna a is 9.00 de mengianu, su de Casteddu Sardu in su portu turìsticu a is 9.30.

Fintzas a oi is atzionis de Flowe no ant pertocau feti sa plàstica. Difatis, gràtzias a s'impignu cosa sua si funt salvaus ses tostoinus impresonaus aintru de retzas e refudus de plàstica.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags