“SustainABIlity”: su progetu sustenìbili de Abi d'Oru

Obietivu: turismu responsàbili
27 Maju 2021
terra

Terra - Dd'ant batiau “SustainABIlity” e, comenti si podit cumprèndiri, est unu progetu de sustenibilidadi. Su progetu tenit unas cantu punnas: sa de moderai a manera sustantziali s'impreu de sa plàstica e de totu su chi impestat, sa de amenguai e cumpensai su papori de anidridi carbònica.

Su babbu de custa idea de sustenibilidadi est su Abi d'Oru, un'Hotel a cincu isteddus chi s'agatat in Poltu Ridundu (Poltu Rutundu in lìngua gadduresa), una fratzioni de Terranoa, in Gaddura.

Po s'Abi d'Oru, difatis, sa saludi de s'òmini e sa de s'ambienti funt de importu mannu. In is annus passaus, feti po fai un'esèmpiu, s'Hotel s'est pigau s'impignu de ndi bogai dògnia produtu “monouso” imboddicau cun sa plàstica.

Su progetu de sustenibilidadi de s'Hotel olit rapresentai unu cumbidu: is turistas depint bìviri sa vacàntzia insoru a manera responsàbili, est a nai respetendi sa natura e in assentu bonu cun su territòriu.

Po su 29 de su mesi de maju chi at a benni, diri chi dd'at biri torra ativu in su traballu cosa sua, s'hotel Abi d'Oru at postu in òpera una filera de pràticas virtuosas. Funt pràticas comenti s'allichidimentu de sa plaja e su prantamentu de 5milla matedus de ratzas autòctonas.

S'impignu de s'Hotel po sa sustenibilidadi ambièntali si cojat beni cun s'impignu a agiudai s'econòmia de su territòriu.

Ma comenti si sbòddiat custu impignu? Simpli, pighendi po su prus traballadoris de su logu e comporendi sa cosa de papai de is impresas sardas.

In prus de totu su chi eus giai contau, depeus aciungi ca in custu progetu de sustenibilidadi funt duas is novidadis mannas. Sa primu si lamat "The Abi Bees" e tenit s'obietivu de promòviri un'allevamentu naturali de abis. Seus fueddendi de un'allevamentu chi at a impreai feti elementus chi non faint dannu a s'ecosistema. Sa segunda novidadi, imbecis, si lamat "Veg" e est unu ristoranti gourmet innoia si podint papai mandiaris vegetarianus e veganus. Custu ristoranti s'aciungit a is àterus tres, e comenti custus etotu at èssiri obertu po finas a is furesteris, est a nai a is personis chi no allògiant in s'Hotel.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags