Po su 2021 su “Life After Oil International Film Festival” at èssiri acasagiau in is comunus de Brindisi e de Biddanoa 'e Forru

Sa manifestada culturali po s'ecologia e is diritus umanus s'at a tenni in su mesi de cabudanni
29 Làmpadas 2021
terra

Terra - Est una manifestada de tzìnema de importu mannu e ocannu puru at èssiri dedicada a su rispetu de sa Terra innoia biveus e a is temas de s'ecologia. Seus fueddendi de su “Life After Oil International Film Festival”, chi in su 2021 lompit a sa de otu editzionis.

Ma cali est sa caraterìstica de su “Life After Oil International Film Festival” de ocannu?

Po primu cosa bisòngiat a nai ca po su 2021 sa manifestada culturali ghiada de Massimiliano Mazzotta s'at a sboddiai in duas regionis: in Puglia, innoia sa tzitadi de Brindisi at a aghilliri su Festival su 17 e su 18 de su mesi de cabudanni chi ant a benni, e in Sardigna, in sa biddixedda de Biddanoa 'e Forru, tzentru famau de sa Marmidda chi at a aghilliri custa manifestada de su 22 a su 26 de cabudanni.

Si perou ligeus beni ita totu ddoi at ai in s'editzioni 2021 de custu festival podeus agatai po finas un'àtera novidadi manna. Difatis, custa manifestada de tzìnema at a auniri su tema de s'ecologia cun cussu de su respetu de is diritus umanus.

lifeSu sindigu de Brindisi Riccardo Rossi e su cussu de Biddanoa 'e Forru Riccardo Onnis narant de èssiri cuntentus meda de podi acasagiai unu festival chi tocat argumentus de importu mannu cummenti su “Life After Oil”. Rossi, difatis, est su primu tzitadinu de una regioni chi sunfrit meda po mori de is sceberus fatus in is annus Cincuanta de su Noixentus. Seus chistionendi de sceberus rapresentaus de sa mantessi indùstria chi impestat su territòriu pugliesu cummenti cussu sardu etotu. Onnis, de parti sua, rapresentat una comunidadi chi in Sardigna at fatu unas cantu batallas po difèndiri s'ambienti, cummenti cussa contra a s'eolicu. In prus, de su 2015 a oi Biddanoa 'e Forru est in prima lìnea po finas po is diritus umanus, poita donat acasàgiu a unu tzentru po migrantis chi bivint beni a cuntatu cun sa comunidadi marmiddesa.

Su festival est aprontau de s'asòtziu “Life After Oil” cun su contribbutu de is comunus de Brindisi e Biddanoa 'e Forru. Sustenint sa manifestada sa Regione Autònoma de Sardigna, sa “Fondazione Sardegna Film Commission”, sa “Fondazione di Sardegna” e “Medicina Democratica”.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags