Sa Sardigna sustenìbili in s'“EU Green Week”

Po unu turismu eticu e sustenìbili in Sardigna
12 Làmpadas 2021
terra

Terra - Dd'as ant presentadas giòbia 3 de su mesi de làmpadas 2021 in s'“EU Green Week”, est a nai sa “Cida Birdi de S'Unioni Europea”. Seus fueddendi de is fainas de s'istrategia regionali po s'isvilupu sustenìbili in Sardigna. Funt is mantessi fainas chi funt istètias argumentu de dibata in su “Forum Sardegna 2030” (Forum Sardigna 2030), unas cantu atividadis chi sustenint su turismu sustenìbili atressu de atzionis-pilota.

sustenibilidadiDifatis, pròpiu su turismu sustenìbili at rapresentau su tema de s'“EU Green Week”. Po fai un'esèmpiu scéti, su webinar intitulau "Soluzioni di turismo sostenibile per ridurre l'inquinamento nel Mediterraneo", chi est istètiu aprontau de sa NECSTOUR (sa boxi de is regionis europeas chi atressu de su turismu s'impignant po sa sustenibilidadi econòmica, sotziali e ambientali) impari a is àterus sòtzius chi aderint a su “Programma Interreg MED”, at tentu sa punna de presentai propostas chi serbint po fai progetus chi iant a dèpiri menguai s'impestadura. Cummenti ddu faint? Atressu de unu tipu de turismu sustenìbili e èticu. Custa, difatis, est istètia un'ocasioni bella po fueddai de progetus de ecoturismu, de cicloturismu, de gestioni de is refudus e de gestioni de is àcuas. Po s'ecoturismu ddoi at su progetu DESTIMED PLUS, po su cicloturismu su progetu MEDCYCLETOUR, po sa gestioni de is refudus e po sa gestioni de is àcuas is progetus funt su BLUEISLANDS e su CASTWATER.

In sa dibata s'est chistionau meda de su Mari Mediterraneu, poita custu rapresentat un'ecostistema meda dilicau, su prus dilicau de totu su mundu. In custa chistioni, duncas, su turismu sustenìbili tenit sa possibbilidadi de fai sa parti cosa sua.

Pròpiu in su “Programma Interreg MED” su “Progetto Orizzontale sul Turismo Sostenibile” tenit a càstiu vinti-cuatru progetus chi funt istètius finantziaus de su Fundu Europeu po s'isvilupu Regionali.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags