Sustenibilidadi: lana de brebei sarda contra a s'impestadura de s'àcua

Edizero e Universidadi contant comenti is "tapetus" assentaus "matint" fintzas a su 70% de s'ollu
10 Làmpadas 2021
terra

Terra - Cun sa lana de brebei bincit sa sustenibilidadi. Est cun sa lana de brebei traballada in Bitzi, bidda in provìntzia de Nùgoro, ca si sanat s'àcua. Po ddu fait s'impreant "tapetus" de lana chi andant assentaus in sa banchina e postus aintru de s'àcua etotu. Aici si ndi liat s'ollu impestadori. Sa lana de brebei, difatis, surbit s'ollu chi s'agatat in is portixeddus.

Custus tapetus funt istètius giai postus in Casteddu in sa Marina de Sant'Elmo, acanta de s'istàdiu bèciu de Sant'Elia.

S'idea est de Edizero, sa sotziedadi de s'imprendidora Daniela Ducato, fèmina famada po is prèmius chi at otentu in su mundu “green”. Sa de is "tapetus" de lana de brebei rapresentat un'idea sustenìbili e Daniela dda mandant ainnantis impari a unu grupu de istudiosus de s'Universidadi de Casteddu.

Su progetu de Edizero e de s'Universidadi s'isboddiat aintru de su "Piano d'Azione" de su "Progetto transfrontaliero GRRinPORT". Unu progetu chi bit Casteddu comenti portabandera e chi tenit sa punna de fai diventai is istruturas de is portus de Casteddu, Ajaciu e Livornu istruturas eco-sustenibilis e eco-innovativas. Totu custu cun s'impreu de orrobba de lana bianca.

Custas "funt - acrarat Oscar Ruggeri, amministradori delegau de 'Industrie Verdi Edizero Architecture for Peace' e po finas pobiddu de Daniela Ducato – unus cantu 'banner' chi tenint giai sa tzerticatzioni de su Ministeru de s'Ambienti". "Sa fortza de sa lana sarda - sighit Ruggeri - est sa de surbiri e martiri is mulìculas de is idrocarburus". Po si cumprèndiri, si si pigant unu chilu de lana e unu chilu de idrocarburus, in 50 diris su banner arrennexit a si papai su 70 % de s'ollu.

"Custu sistema - pretzisat Ruggeri - est istètiu isperimentau giai in is ìsulas Egadi e in is Baleari" e – sutalineat - "in àterus cuntestus podit èssiri modificau cun s'aciunta de ortigu".

Po chistionai de custu progetu is assessoris Alessandro Sorgia e Alessandro Guarracino de su comunu de Casteddu e su presidenti de s'Autoridadi Portuali de Sardigna Massimo Deiana ant pigau parti a un'atopu chi s'est tentu in is diris passadas. Is Assessoris e su Presidenti ant bantau meda su progetu sustenìbili de Edizero e ant sutalineau ca tènni portus “green” est una cosa de importu mannu po atirai turistas e diportistas.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags