Sustenibilidadi in s'atopu chi aunit su smurtzu asuta de is matas de olia e is passilladas in su sartu

Custas fainas funt cuncodradas de s'Assessoradu de sa defensa de s'Ambiente de sa Regione Autònoma de Sardigna
16 Làmpadas 2021
terra

Terra - Dd'ant aprontau po dogna fini de cida de su mesi de làmpadas de su 2021. Est su smurtzu asuta de is matas de olia, chi ocannu est a sa primu editzioni cosa sua. A cuncodrai is atòbius est istètiu s'Assessoradu de sa defensa de s'Ambiente de sa Regione Autònoma de Sardigna chi in diri de oi est ghiau de Gianni Lampis.

Sa punna de custas fainas est sa de avalorai s'ambienti de s'isula nostra. Sa sustenibilidadi, difatis, est unu tema de importu mannu, prusatotu si dda pigaus in cunsidèriu cummenti campu istratègicu chi, impari a sa cultura, a s'economia e a su turismu, podit serbiri a valorizai is territorius sardus. Manifestadas “green” (est a nai birdis) cummenti su smurtzu asuta de is matas de olia funt difatis importantis po amparai s'ambienti e puru po torrai a iscoberriri sa bellesa de is sartus nostrus.

Po custa arrexoni su smurtzu at èssiri sèmpiri acumpangiau de unas cantu passilladas e po finas de calincuna bisita a is mulinus innoia si podint ancora agatai is molas antigas chi beniant impreadas po fai s'ollu.

smurtzuPo s'editzioni 2021 sa manifestada tenit su patrociniu de su Ministeru de is polìticas agrìculas de s'istadu italianu, su de su Ministeru po is Benis Culturalis e su de sa Lilt, est a nai de sa “Lega italiana per la lotta contro i tumori”.

Intre is comunus sardus chi pigant parti a custa manifestada s'agantant: su comunu de Sènnaru, innoia su smurtzu s'est a tentu su 6 de làmpadas passau, su de Serrenti, chi at a fai s'atopu su 19, su de Samatzai, chi dd'at aprontau po su 20 de làmpadas, is comunus de Gonnos, Sini e Ùsini, chi dd'ant a fai su 26, e is comunus de Cùllieri e de Irbono chi dd'ant a apariciai po su 27 de làmpadas.

Bisòngiat a pretzisai ca custas fainas funt cuncodradas sighendi passu passu is règulas anti-covid.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags