Ambienti: “Portala nel cuore”, sa campagna de comunicatzioni de ADM e RAS

Caterina Murino, Geppi Cucciari e Luigi Datome protagonistas in is spot chi amparant sa marina
20 Argiolas 2021
terra

Terra – Si lamat “Portala nel cuore” e est tucada su 15 de su mesi de argiolas passau. Est sa campagna de comunicatzioni istitutzionali bòfia de s'ADM (Agenzia delle Accise Dogane e Monopoli) e de sa Regioni Autònoma Sardigna po amparai s'ambienti.

Su progetu de comunicatzioni “Portala nel cuore” tenit sa punna de amparai s'arena, is cocòdulas, su conchillu e àterus materialis naturalis chi s'agatant in sa marina e in su fundu de su mari.

Ma poita si olit protègiri sa marina? Poita, comenti si scit, dògnia annu chini si ndi benit in vacàntzia in Sardigna si ndi liat cun sei unu “biculeddu” de sa marina sarda fadendi dannus mannus a s'ambienti.

Ma poita ddu faint? Po tenni un'arregordu de is vacàntzias sardas o po ignoràntzia? De seguru calencunu olit unu souvenir, àterus ancora non cumprendint su dannu chi funt fadendi a s'ecosistema. Funt in medas, difatis, is chi non iscint ca custu no est unu cumportamentu giustu. A dògnia manera non si podint giustificai.

Comenti acrarat s'“ ADM”, “liendi is materialis de sa marina e de su fundu de su mari s'impoberat su paesàgiu e s'istrupiat s'ambienti”. Chini ndi furat is cosas chi s'agatant in sa marina, duncas, cummitit unu reatu. Po custa rexoni podit èssiri puniu cun nd'una multa chi andat de 500 a 3000 eurus.

Po fai cumprèndiri a chini ligit cantu est grai custu fenòmenu tocat a ammentai puru ca in su 2020, in is aeroportus de Terranoa e de s'Alighera, is funtzionàrius de s'ADM ant recuisidu prus de 80 chilus intre cocòdulas, arena e conchillus liaus de sa marina sarda e po finas ca is turistas iant cuau custus materialis aintru de is bagàllius po si ddus ponni in domu.

Sa campagna de comunicatzioni “Portala nel cuore” tenit cummenti testimonial nòminis sardus famaus meda, est a nai: Caterina Murino, Geppi Cucciari e Luigi Datome. Funt is nòminis de tres personis chi ant donau s'agiudu insoru po fai cumprèndiri a genti meda ca su tema de su rispetu po s'ambienti est de importu mannu. Is spot previdius funt cuatru. Su primu est unu spot colletivu e est bessiu su 15 de su mesi de argiolas; su de duus est su videu cun Caterina Murino de su 19 de argiolas; ant a sighiri su spot cun Geppi Cucciari de su 22 e cussu cun Luigi Datome de su 26.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags