Portescùsi oberrit torra s'eca a s'Euroallumina

Una tzentrali termueletrica noa chi si ndi iscaresit de sa sustenibilidadi
24 Argiolas 2021
terra

Terra - In Portescusi si ndi iscarescint de sa sustenibilidadi e de su chi funt sa saludi de s'ambienti e de s'òmini. De is ùrtimas novas, difatis, beneus a sciri ca pròpiu in Portescusi si olit ponniri una tzentrali termoeletrica a gas. A ndi fueddai, in is diris passadas, est istètia “Italia Nostra Sardegna”. S'assòtziu, difatis, at ammostau su pentzu cosa sua in su cuntestu de sa protzedura de PAUR (Provedimentu Autorizatòriu Ùnicu Regionali) presentendi unus cantu annotus. Su PAUR, dd'amentaus, est su protzedimentu chi s'incarrelat po is progetus sutapostus a protzedura de efetu ambientali.

terraPo “Italia Nostra Sardegna” sa chi lompit de s'Euroallumina no est una noa bella. “Torrai a pònniri in motu sa tzentrali at a fai dannu mannu a s'ambienti e a sa saludi de s'òmini” - pretzisat s'assòtziu ambientalista in nd'una nota de imprenta. “Giai in su 2006 – sighit sa nota  – su raportu de sa Regioni Autònoma de Sardigna asuba de sa saludi de sa genti chi bivit in su costau de is logus innoia s'agatant industrias, minieras e militaris [...] at ammostau comenti is maladias de su territòriu de Portescusi funt causadas de s'impestadura de is sustàntzias chi ndi bogant is industrias de Portovesme”. A ddu nai funt is risultaus de is analis fatas in su 2008 de su “Dipartimento Sanità pubblica, Medicina del lavoro” de s'Universidadi de Casteddu. Is datus ponint in evidètzia ca is pipius de su territòriu de Portescusi funt fertus de deficit cognitivu po mori de su prumu. Is valoris de prumu agataus in su sànguini insoru, difatis, funt prus artus de 10 μg/dl.

No est totu. Un'“àtera cumfirma – pretzisat Italia Nostra – est lòmpia in su mesi de lampadas de su 2019” fadendi connosciri su “'QuintoRapporto S.E.N.T.I.E.R.I. – studio epidemiologico'. Unu documentu chi torrat a fueddai de su nùmeru mannu de mortis e de maladias in su SIN Surcis-Igresienti Guspinesu e ponit s'atzentu asuba de su riscu chi ferrit a sa saludi de is traballadoris”.

In is annotus cosa sua “Italia Nostra Sardegna” ponit in evidèntzia ca custu progetu non est sustenìbili po nudda e fait dannu a s'ambienti. In prus de totu – si pretzisat - “su fàbricu de impiantus termoeletricus nous a combustìbili fossili cuntrastat cun is polìticas europeas in matèria de gherra a su cambiamentu climaticu” e cuntrastat puru “cun su Pianu energeticu de sa Regioni Sardigna etotu”.  

E duncas? Duncas “Italia Nostra Sardegna” pentzat ca nisciuna faina noa depat èssiri autorizada chentza sa tzertesa chi non fatzat dannu a s'ambienti”. Po s'assòtziu “calisisiat traballu depit èssiri sutapostu puru a sa DNSH (Do Not Significant Harm)”.

Sa solutzioni giusta po “'Italia Nostra Sardegna' est sa de agatai solutzionis de traballu prus sanas po is traballadoris e po sa genti de Portescusi e de su Surcis”.  
A s'acabbada, duncas, torraus sempri ingunis: nci bolit unu Pianu chi siat sustenìbili.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags