In su "Vigneto Santu Teru" nascint is binus chi respetant s'ambienti de su Sarcidanu

Binus biològicus de calidadi manna, chi funt su resurtu de unu traballu chi pentzat a su benidori de sa terra e de chini dda bivit
3 Argiolas 2021
terra

Terra - S'amori po sa terra e po saludi sua est su resumu de sa filosofia chi fait moviri su traballu de s'azienda "Vigneto Santu Teru", una realidadi produtiva de su Sarcindanu chi pentzat a donai una terra sana e lìmpia a is inzènnerus chi ant a benniri. Po ddu fai custa realidadi produtiva at cojau su mètodu de sa messarìtzia biològica.

S'azienda
"Vigneto Santu Teru" s'agatat in Nuradda, una biddixedda in provìntzia de Casteddu, unu logu chi tenit unu sartu fatu de terras bellas meda po sa messarìtzia e prusatotu po sa coltivatzioni de sa bidi.

Sa Cantina "Vigneto Santu Teru", chi est de propriedadi de Ugu Sionis, est una realidadi produtiva bòfia de un'òmini chi at fatu de sa bìngia sa vida sua.

Is bidis de
su "Vigneto Santu Teru" funt aradas a cuatruxentus metrus de artària asuba de su mari. Seus fueddendi de bides traballadas cun amori e chentza de impreai sustàntzias chi faint dannu a s'ambienti e a sa saludi de s'òmini. Dògnia fundu, difatis, est traballau cun incuru fitianu e cun atentzioni manna.

Is cuàturus ètarus de terras innoia funt pastinadas is bidis de sa bìngia Santu Teru funt totu su chi su babbu de Ugo at lassau a Ugo etotu e a su fradi Lionello: una tanca bella manna coltivada puru a ortalìtzias.

terraNo est totu, poita in Santu Teru is fradis Sionis ant pesau puru un'agriturismu batiau cun su nòmini de "Farfullanu". In prus de custas fainas, is de Sionis allevant po finas brebeis de ratza sarda. Ma torrendi a is bides, a sa bìngia e s'ambienti bisòngiat sutalineai ca
in Santu Teru sa binnenna est fata a manera sustenìbili, est a nai ca est sèmpiri fata a manu.

Agoa de ai binnennau s'àxina, custa lompit in cantina e cumintzat sa fasi de sa vinificatzioni, una fasi chi si fait cun is fermentus de su croxu de s'àxina etotu. S'incubonadura at a sighiri po unu tempus chi andat de dexi a is binti diris.

De su traballu in bìngia e in cantina si faint binus sustenìbilis chi funt un'ispantu feti a ddus contai, funt ampuddas màstrinas primorosas, binus biològicus cun etichetas nòdidas meda in su mundu vitivinìculu.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags