Sa sustenibilidadi de sa Cantina Siddùra

S'azienda de Logusantu cojat dògnia diri sa “filosofia green”
14 Austu 2021
terra

Terra - Siddùra sighit a fai passus mannus aintru de su mundu de sa sustenibilidadi. Sa cantina gadduresa, difatis, at pigau sa detzisioni de impreai prus pagu imbirdi po is ampuddas cosa sua e de investiri in materiali riciclau.

Una detzisioni chi sighit su camminu chi custa realidadi produtiva at sèmpiri fatu a bia de una produtzioni ecològica. Cun custa polìtica si resparmiant 100 grammus de imbirdi po dògnia ampudda.

Sa Cantina Siddùra nascit cun nd'un'idea de sustenibilidadi crara. Difatis, custa realidadi produtiva s'est sémpiri mòvia in su mundu de sa massaria sustenìbili, duncas sa detzisioni de impitai materiali riciclau po fai is ampuddas no est un'issèberu de marketing, ma est un'agiudu ladinu a s'ambienti e po finas un'atzioni de importu po su benidori.

sidduraPo sa cantina de Logusantu s'atentzioni a s'ambienti s'isbòddiat puru cun sa mèngua de is resuzus de sa traballadura. Cun custa mèngua, difatis, s'azienda gadduresa s'agatat sèmpiri prus a su costau de realidadis de primori, comenti cussas de is Paisus de s'Europa de su cabu de susu. Paisus chi funt un'esèmpiu mannu, poita funt logus innoia sa mèngua de is resuzus de traballadura rapresentat unu printzìpiu importanti. In custus Paisus, difatis, si sighit sa filosofia de meguai s'impreu de sa pràstica, de s'imbirdi, de su paperi e de totu su materiali de imboddicamentu chi pertocat is produtus de s'indùstria agroalimentari.

Nau in pagus fueddus, su de s'imbirdi est un'àteru passu fatu de Siddùra conca a su mudamentu ecològicu cosa sua. Unu camminu chi est incumentzau impreendi una manera de acuai inteligenti. Est nai una manera de donai àcua a is matas chi permitit de dda distribuiri feti candu sa mata nd'abisògiat po crèsciri. Non est totu, poita custu camminu est marcau puru de un'impreu de produtus fitosanitàrius de pagu contu e si podit po finas a nai ca sa punna de s'azienda est de ddus liai dessintotu.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags