Sostenibilidadi: in Sardigna nascit “Best”, sa primu retza de “bike hotel”

Terra – Si lamat “Best” (est a nai “Biking Experience Sardinia Tourism”) e est unu progetu de turismu sustenibili chi tenit comenti protagonista unus cantu comunus de Sardigna.

In totu funt 25 is impresas e s'agatant in 14 comunus: noi comunus de sa costera (s'Alighera, 'Osa, Crabas, Casteddu Sardu, Aristanis, Portu Tùrre, Istintinu, Tresnuraghes, Biddanoa Monteleone) e cincu chi abbarrant a parti de aintru (Guspini, Macumère, Santu Lussurgiu, Ula e Tàtari). Totus impari ant fatu nàsciri sa primu retza de bike-hotel po su ciclu-turismu in Sardigna, una retza innoia si podint impreai puru is bicicretas eletricas.

Aintru de custa retza turìstica sustenìbili s'agatant 16 hotel; intre custus nci funt puru duus albergus spainaus. In prus s'agatatant: un'agriturismu, tres sotziedadis de nolègiu bike e scampirrada, unu tour operator, una sotziedadi de trasportus e tres cantinas chi tenint su còmpitu de fai coperai custas realidadis cun su mundu de sa massarìtzia.

“Best” est arribbau primu in sa graduatoria de su bandu “Turismo, cultura e ambiente - Sardegna, un’Isola sostenibile” de “Sardegna Ricerche”, s'agentzia de sa Regioni chi agiudat is impresas e s'innovatzioni in s'ìsula nosta. Difatis, su bandu tenit sa punna de fai arribai s'oferta de serbìtzius tochendi su turismu sustenìbili cun s'isvilupu e s'afortiamentu de unas cantu propostas.

Sa retza est ghiada de s'imprendidori Guglielmo Machiavello de s'alberugu spainau Villa Asfodeli de Tresnuraghes, unu bike-hotel verdaderu chi de annus meda tenit su cicluturismu puru in sa proposta cosa sua. A sighiri pigant parti a “Best”: s'hotel Alma, s'hotel Angedras, s'hotel Country Resort, su Biking Sardinia, sa Cattogno Viaggi, sa cantina Poderi Parpinello de S'Alighera, s'hotel Al Gabbiano de 'Osa, sa cantina Salto di Coloras de Tresnuraghes, sa Attilio Contini di Crabas, s'hotel Mistral 2, su Bike OR de Aristanis, s'hotel Sa Rocca de Guspini. s'Agriturismu Sa Tanchitta de Ula, s'albergu spainau Antica Dimora del Gruccione de Santu Lussurgiu, s'hotel Marghine, s'Esedra Escursioni de Macumere, sa staria Minerva de Biddanoa Monteleone, s'hotel Leonardo Da Vinci de Tàtari, s'hotel Riviera, s'hotel Bajaloglia de Casteddu Sardu, su residence Il Melo de Portu Tùrre, s'hotel Cala Reale, s'hotel Silvestrino e su Windsurfing Center de Istintinu.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22