Ambienti: sa vitòria de is ambientalistas sardus

Su TAR frimmat sa cassa de sa tùrturi aresti
5 Cabudanni 2021
terra

Terra - Su TAR Sardigna amparat s'ambienti e is animalis chi ddoi bivint: su Tribunali Amministrativu Regionali (TAR) de sa Sardigna at donau arrexoni a su "Gruppo di intervento giuridico" (Grig): in s'ìsula sa tùrturi aresti non si podit cassai.

Su 2 de su mesi de cabudanni passau, ddu ammentaus, est torrada a incumentzai sa cassa, ma cun sa sentèntzia de su TAR is cassadoris de Sardigna non podint isparai prus a custu pilloni de sa famìlia Columbidi chi fait su niu in su su territòriu sardu.

Manna 27 tzentìmetrus e cun nd'unu pesu de 145-160 grammus, sa tùrturi aresti (Streptopelia turtur) de Sardigna est sa rapresentanti prus pitia de sa famìlia de is Columbidi. In diri de oi si connoscit po finas poita custu pilloni tenit una carena istinca, una conca pitica e unu bicu curtzu.

Duncas, is giuigis amministrativus faint binci is ambientalistas chi, atressu de s'abogau Carlo Augusto Melis Costa, ant bòfiu amparai sa tùrturi aresti. Sa frimmada est tucada luegu. Su motivu est acapiau a sa matàntzia chi iat èssiri fata cun probabilidadi manna de sa cassa, comenti si fueddàt in su calendàriu de cassa, in sa parti innoia si chistionàt de "assurdo carniere potenziale di 539.805 capi abbattibili dai 35.987 cacciatori autorizzati".

Su Tribunali Amministrativu Regionali de sa Sardigna aghillit sa rechesta de s'abogau Melis Costa. Ddu fait istabilendi ca cussa "brisaca" est manna meda. Ant gherrau impari a su "Gruppo di intervento giuridico" (Grig), a su "Wwf Italia", a sa "Lega per l'abolizione della caccia", a s'"Ente Nazionale Protezione animali" (Enpa), a sa "Lega Anti Vivisezione" (Lav), a sa Lega Italiana Protezione Uccelli-BirdLife Italia (Lipu-BirdLife Italia) e a sa "Lega Nazionale per la Difesa del Cane" (Lndc animal). Su calendàriu de cassa 2021-2022 est istètiu frimmau puru po àterus pillonis, est a nai po su cabarossu, po sa bicatza e po sa lèpiri de argiola.

Non est ancora acabbada innoi, poita su 14 de su mesi de cabudanni ddoi at èssiri un'àtera sentèntzia chi pertocat àterus pillonis.

© RIPRODUZIONE RISERVATA
Tags