Ambienti: in Tortolì torrat s'atopu cun "Ripuliamo il mare"

In Ogiastra una diri de educatzioni ambientali e de allichidimentu de sa costera
16 Cabudanni 2021
terra

Terra - In Tortolì torrat po su de duus annus "Ripuliamo il mare". Ddu fait cun duus atopus. Su primu est prevìdiu po domìnigu 19 de su mesi cabudanni e at èssiri dedicau a unu tema de importu mannu, est a nai a s'educatzioni ambientali. S'atopu s'at isboddiai cun s'allichidimentu de s'àcua de su mari e de sa costera.

Su traballu incumentzau su domìnigu at duncas a sighiri su lunis cun su cunvegnu asuba de s'isvilupu sustenìbili in Ogiastra.

"Ripuliamo il mare" est su cuntribbutu ogiastrinu a sa campagna mondiali po s'amparu de s'àcua e po acastiai is Ocèanus.

S'assòtziu "Il Triangolo" at aprontau s'atopu de domìnigu e su de lunis cun s'agiudu de "Blue Sardinia", de s'stitutu iscolàsticu Ianas e de is "ACLI Cagliari". S'atopu est istètiu cuncodrau cun su contribbutu de sa "Fondazione di Sardegna".

ripuliamo il mare"Ripuliamo il mare" at a incumentzai domìnigu a is 9.30 de mangianu cun sa regorta de s'àliga de s'arenàrgiu e de su mari; innoi s'at a intrai cun su gommoni. Su progetu at a trisinai is piciocus chi tenit de is 8 a is 16 annus e s'at a isboddiai in s'arenàrgiu de "La Capannina", in Arbatassa.

Su Lunis, sa diri de su cunvegnu "Tra terra e mare: quale futuro turistico per l'Ogliastra?", s'atopu at incumentzai a is 17 de merì in sa sala cunvegnus de su cunsòrtziu industriali de sa Provìntzia de Ogiastra.

Franco Amendola, su Presidenti de su cunsòrtziu industriali, at a oberri su cunvegnu. S'atopu at a sighiri cun sa relata de su naturalista Francesco Lecis, sa de Elisabetta Mocci de sa "Rete regionale per la protezione della Fauna Marina" de sa Regioni Autònoma de Sardigna, sa de Mauro Carta de s'assòtziu "Blue Sardinia" e sa de su sìndigu de Lanusè Davide Burchi. Po "Tra terra e mare: quale futuro turistico per l'Ogliastra?" ddoi at èssiri puru unu professori de s'Istitutu iscolàsticu Ianas de Tortolì.

"Tra terra e mare: quale futuro turistico per l'Ogliastra?" at èssiri moderau de su giornalista e diretori de "Spondasud" Alessandro Aramu.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags