Ambienti: una diri ecologica aprontada de is "Amici di Talmone e Cala di Trana"

In Palau volonteris e turistas allichidint s'arenàrgiu
15 Cabudanni 2021
terra

Terra - Cussa chi s'est isboddiada in Palau (Lu Palau in lìngua gaddueresa) su 12 de su mesi de cabudanni passau est istètia una diri ecologica chi at libberau s'ambienti de s'àliga lassada de s'òmini.

Is "Amici di Talmone e Cala di Trana" ant aprontau totu e is volonteris e is turistas si funt armaus de passèntzia: impari ant allichidiu s'arenàrgiu.

Ma ita ant regortu in s'arenàrgiu is "Amici di Talmone e Cala di Trana" in sa diri batiada "Insieme per una spiaggia più pulita"? Turistas e volonteris ant agatau dògnia ratza de cosa: pratus e tatzas de pràstica, ampuddas de imbirdi, latinas betzas perdalis, salvieddas igiènicas e prusatotu refudus de pràstica in cantidadi manna meda.

Is turistas e is volonteris ant traballau sena de pàsiu in su caminu chi portat a sa "Batteria Militare di Talmone", a faci de Sa Madalena.

amici di talmoneA ispirai volonteris e turistas est istètiu s'amori mannu po su mari e su respetu po s'ambienti. Respetu chi a cantu parrit no est cosa de totus. Est aici chi òminis e fèminas armaus de guantus e tanallas ant limpiau s'arenàrgiu de Talmone in su tretu chi andat de "Cala Scilla" e arribat a "Punta Don Diego".

Su traballu fatu domìnigu est istètiu profetosu meda, intre is rocas e in s'arenàrgiu is volonteris ant agatau po finas tzicas medas de sigareta e unu pertili bèciu.

Po is aprontadoris de sa diri ecologica "Insieme per una spiaggia più pulita" su traballu fatu est istètiu profetosu meda. Po issus, difatis, su bilantzu est positivu.

Sa de "Insieme per una spiaggia più pulita" est istètia una diri de festa, una diri passada in mesu asa natura, una diri chi teniat sa punna de sensibilitzai is furisteris a su respetu po s'ambienti marinu.

Bisòngiat a pretzisai, perou, ca s'atopu de domìnigu passau est feti unu de is medas chi ant a sighiri in si cidas imbenientis.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags