Sa de duus vitòrias po is ambientalistas sardus
Terra - Àtera vitòria manna de is ambientalistas contra a is cassadoris. Apustis de sa firmada de sa cassa de sa trùturi, su 14 de su mesi de cabudanni passau, su T.A.R. firmat po finas sa cassa de su cabàrossu e de sa lèpiri de argiola.
In pagu fueddus is giugis amministrativus sardus ant aghilliu s'istàntzia cautelari presentada de s'abogau Carlo Augusto Melis Costai. A fai càusa funt istètius is assòtzius ambientalistas "Gruppo d'Intervento Giuridico", "WWF Italia", "Lega per l'Abolizione della Caccia", "E.N.P.A.", "L.A.V.", "LIPU-BirdLife Italia", "LNDC Animal Protection". Is assòtzius, difatis, ant impugnau su calendàriu sardu de cassa regionali de su 2021- 2022 e dd'ant fatu poita teniat previsionis mannas abberu asuba de su nùmeru de trùturis, cabàrossus e lèpiris de argiola chi si podiant cassai.
Duncas, su T.A.R. Sardigna refudat is argumentatzionis de sa Regioni Autònoma de Sardigna e de s'"Associazione Nazionale Libera Caccia" e "Federcaccia" e bullat su calendàriu de cassa chi pertocat custas ratzas de pillonis.
"Su T.A.R. Sardigna - iscririt in nd'una su presidenti de su 'Gruppo d'Intervento Giuridico' Stefano Deliperi - at cunsiderau a manera esplìtzita ca 'sa determinatzioni pigada de sa Regioni podit contribuiri a unu peoramentu grai de sa subravivèntzia de custas ratzas de pillonis', comenti inditau asuba de su calendàriu de cassa in su parri de s'Ispra (est a nai de s'“Istituto superiore per la ricerca e la protezione dell'ambiente”) e comenti inditant puru is cumpudadas de sa fera fatas de sa Regioni etotu".
No est acabbada innoi, poita su chi ant denegau is giugis amministrativus sardus est sa suspensiva pedia de is ambientalistas asuba de sa cassa de sa becàcia.
De dògnia manera, est ladinu ca po amparai a s'ambiembi su T.A.R. Sardigna allonghiat totu una filera de tzensuras chi pertocant su calendàriu de cassa sardu.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
