Ambienti: una discàrriga in su Pinedu de Platamona

Is ecologistas si ndi pesant e reclamant bonìficas
17 Ladàminis 2021
terra

TerraSu pinedu de Platamona in Portu Turre (Posthudòrra in turritanu) est impestau de àliga. Po mori de sa manu de s'òmini unu logu ispantosu si mudat in nd'una discàrriga e a faci de custa destrossa is ecologistas non si citint. Est aici chi si ndi pesat sa boxi de Stefano Deliperi, presidenti de s'assòtziu ecologista “Gruppo d’intervento giuridico (Grig).

Ma ita at fatu Deliperi po defendiri su pinedu? Su presidenti de su Grig si fait isciri ca at avantzau un'istàntzia de atzessu tzìvicu po informatzionis ambientalis in matèria de bonìfica po sa discàrriga illìtzita de àliga chi s'agatat in su costau de s'istrada lacanàrgia a su pinedu coisteri de Platamona, pròpiu in su tretu de territòriu chi est de propiedadi de su comunu de Portu Turre.

Su “Gruppo d’intervento giuridico” at fatu connòsciri s'acuntèssia a su Comunu de Portu Turre, a su Noe, est a nai a su “Nucleo Operativo Ecologico” de is Carabineris, e a sa Politzia de su Comunu.

discarriga“Su pinedu de Platamona – sutalineat s'assòtziu ambientalista – est amparau de vìnculu paesagìsticu”. “Is orus de is istradas printzipalis e de is istradas segundàrias – si ligit in sa denùntzia firmada de su presidenti de su 'Gruppo d’intervento giuridico' Stefano Deliperi - funt sèmpiri prus unu logu de iscàrrigus foras de contu. Funt iscàrrigus de àliga perigulosa po sa saludi pùblica e po s'ambienti”.

Ma cali importu iat a tenni un'interventu de bonìfica po custu logu amparau de vìnculu paesagìsticu? A rispòndiri a sa dimanda est sa nota de Deliperi etotu. Difatis in sa nota si ligit: “Un'interventu de bonìfica fatu sena de pèrdiri tempus est de fundamentu, comenti iat èssiri de fundamentu una vigilàntzia fata beni”.

Ma comenti s'iat a podi acastiai su logu? Po su presidenti de su Grig s'iat e podi acastiai assentendi “telecameras cuadas a manera adeguada”. A pentzu suu feti aici si podit “firmai una molenteria chi est sèmpiri prus iscumpudia”.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags