“GioIre Bio”: un'azienda agricola de Aristanis nàscia cu sa punna de sa sustenibilidadi

Una massarìtzia biologica e a Km0
3 Ladàminis 2021
terra

Terra - Si lamat “GioIre Bio” e est un'azienda agricola de Aristanis. “GioIre Bio” fait ortalìtzias e est nàscia in su 2012 in nd'unu sartu chi si tzerriat Bennaxi.

I concas de custu progetu de sustenibilidadi, chi cojat una manera sana de bìviri e respetat s'ambienti, funt su biologu-ecologu Giovanni Fenzi e s'architetu de su paesàgiu Irene Volpi.

Po Irene e Giovanni fai massaritzia biologica olit nai ammostai de cumprèndiri beni su raportu de responsabbilidadi intre s'ambienti naturali e s'òmini. Custu raportu si fabricat chentza s'impreu de sa chìmica e atressu de pratigàs agronomicas chi tenint sa punna de mellorai e donai richesa a s'ambienti. Feti aici si faint prodotus sanus.

terra“GioIre Bio” est un'azienda chi sighit unu modellu ecosostenibili cun nd'un'etica de su consumu, de sa produtzioni e de su traballu agrìculu forti meda. “GioIre Bio”, difatis, si torrat a fai a is printzipius de sa massaria biologica: in ierru arat feti produtus ierrilis, in istadi produtus chi pertocant custa stagioni e aici po dogna momentu de s'annu. S'azienda at cojau custa filosofia poita, comenti si podit cumprendiri, calisisiat ortalìtzia arada e regorta in sa stagioni giusta est meda prus bella e meda prus saboria, e est prus bella e prus saboria poita coit atressu de su ciclu naturali cosa sua, est a nai ca coit chentza nisciunu manìgiu.

Ma cali funt is vantàgius de papai ortzalìtzias fatas in su tempus giustu? Su primu vantàgiu est economicu e energeticu. Totu sa birdura fata in su tempus cosa sua, difatis, po coi non tenit bisòngiu de nisciunu agiudu: nci pentzat sa natura!

In totu custu bisòngiat po finas a nai puru ca is ortzalìtzias chi si comporant in sa stagioni giusta funt ricas meda de sustàntzias chi si perdint candu si papat fruta e birdura foras de sa stagioni produtiva insoru. No est po nudda ca is produtus fatus de s'azienda agricola “GioIre Bio” funt totus produtus a Km0, est a nai ca benint araus e bendius a ingìriu de pagu chilometrus, duncas non funt feti bellus: funt pagu carus puru.

Su produtu a km0, est doverosu a ddu sutalineai, abasciat su prètziu de su trasportu e cussu de s'imboddicàmini puru. Totu custu andat a vàtagiu de s'ambienti e de sa saludi de s'òmini.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags