Sostenibilidadi: online s'avisu regionali po is comunus chi ant comporau produtus fatus cun materialis de recùperu
Terra - Est unu passu mannu a bia de unu caminu chi tenit sa sustenibilidadi comenti punna cosa sua. Seus fueddendi de s'avisu pubricau su 13 de su mesi de ledàminis passau de s' “Assessoradu de sa Defensa de s'Ambiente” in su giassu de sa “Regione Autònoma de Sardigna”. Un'avisu chi pertocat is finantziamentus chi sa RAS olit donai a is comunus sardus chi tenint s'ambienti in su coru e chi po custa rexoni faint de totu po ddu difèndiri.
Is finantziamentus de s'“Assessoradu de sa Defensa de s'Ambiente”, difatis, pertocant is rimbussus de donai a is comunus chi ant comporau produtus fatus cun materialis de recùperu. Chistionaus de: follus de paperi, pinnas po iscriri, “block notes”, ma po finas mobìlia po is aposentus, bustas, calendàrius e ateras cosa meda.
Ant a otèniri su finantziamentu is comunus chi – si ligit in su giassu de sa “Regione Autònoma de Sardigna - “ant respetau is regulas de is apaltus pubricus. Custas, chi funt validas a cumentzai de s'1 de su mesi de gennàrgiu de su 2020, si podint agatai in is 'Criteri Ambientali Minimi (CAM)'”.
Is comunus interessaus a pediri su finantziamentu ant a podi presentai sa dimanda intru s'8 de onniasantu de su 2021 e dd'ant a depi fai atressu de su serbìtziu PEC. Is documentus, difatis, depint èssiri mandaus a s'indiritzu: difesa.ambiente@pec.regione.sardegna.it.
Impari a s'avisu, in su giassu de sa RAS s'agatat su modulu chi s'“Assessoradu de sa Defensa de s'Ambiente” etotu at aprontau po permìtiri a is comunus de otèniri su rembussu.
Bisòngiat po finas a sutalineai ca custu dinai est unu finantziamentu chi sa Giunta regionali at detzìdiu de donai a is comunus po sighiri sa batalla cosa sua in defenda de s'ambienti e de sa sustenìbilidadi. Est a nai ca, cust'avisu est in lìnia cun is obietivus de s'”Agenda 2030” chi, comenti eus pretzisau ortas meda, bit in prima lìnia sa Sardigna puru.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
