Sustenibilidadi: Casteddu e s'app contra a s'isperdìtziu de sa cosa de papai
Terra - De su mesi de argiolas Casteddu fait parti de sa retza contra s'isperdìtziu "Too good to go", s'app chi donat a is butegheris sa possibilidadi de torrai a donai valori a sa cosa chi est abarrada sena de bèndiri e a sa genti de comporai a istracu baratu sa cosa de papai chi est ancora frisca.
Atressu de "Too good to go" is butegheris podint bèndiri is "Magic Box", sachitas cun is prodotus abarraus in butega chi non si podint isperdissiai de cantu funt bonus.
Una solutzioni bella e segura, chi in nd'un'annu de crisi comenti custu at agiudau butegheris e osteriarzus a amenguai s'isperdìtziu de sa cosa de papai e po finas a non pèdiri dessintotu su guadàngiu. In su mantessi tempus sa genti podit comporai sa “box” de prodotus chi non funt istètius bendius agiudendi sa busciaca sua e s'ambienti puru. "Too Good To Go", difatis, tenit sa punna de cumbàtiri s'isperdìtziu de sa cosa de papai po amparai a s'ambienti. Ddu fait gràtzias a su rispàrmiu de 2.5 chilus de CO2 emìtia po dògnia Magic Box comporada.
"Too Good To Go" est un'app fortunada e chi praxit a is butegheris casteddajus. Custus funt parti ativa in sa lota contra a is isperdìtzius.
"Too Good To Go" s'agatat in 14 Paisus de Europa e in is Istadus Ùnidus e tenit 40 milionis de impitadoris pagu prus o mancu.
Ma comenti funtzionat sa app? Simpli: is butegheris podint insertai sa disponibilidadi de is “box” sena de inditai cun pretzisioni cali tipu de prodotu ant a ponni aintru. Su butegheri at a ponni sa cosa chi no at bèndiu. Chini còmporat, imbecis, depit intrai in sa app atressu de unu "smartphone" e depit fai sciri cun pretzisioni innoia s'agatat. Fadendi aici at a agatai a discansu is butegas chi pigant parti a s'initziativa e chi s'agatant a pagu tretu de issu etotu. Duncas, chini comporat podit pigai sa pròpriu sachita de prodotus a pagu prètziu, paghendi in deretura atressu de sa app e aorrendi s'iscàmbiu de dinai. Agoa, in s'ora iscerada at a pigai sa pròpriu “Magic Box” in butega.
A.C.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
